為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2020 年 05 月 06 日

「香港仔」上位靠食腦 許濤任TVB主席

電視廣播(TVB)自從「殼王」陳國強月前退任主席,個位懸空兩個幾月後,終敲定由原任TVB執行董事許濤接任。港人對呢位四十七歲嘅許濤較陌生,查實佢係典型香港叻仔嘅成功寫照,今次喺TVB上位成功,絕非偶然。
三歲隨家人由內地來港嘅許濤,其後考入名校「華仁」。大學時代喺美國頂尖嘅康乃爾大學取得碩士學位,攻讀電子工程學。畢業後先後任職唔少大企業,最出名係擔任高盛(亞洲)投資銀行部執行董事,亦曾喺知名管理顧問公司麥肯錫擔任要職。
因為表現出色,畀華人文化集團董事長兼CEO黎瑞剛相中,搵佢擔任首席營運官及執董。黎瑞剛來頭不小,有中國傳媒大亨之稱,佢打造嘅華人文化集團,一九年獲國家電影局頒發跨省電影院線牌照,地位非同小可。黎瑞剛對許濤份外賞識,消息人士話,除睇中佢嘅香港人身份外,亦欣賞對方形象專業,同基金界熟悉,有助公司擴大影響力。

外界關注換上新人事嘅TVB將如何走出新路向。

 

出身名校嘅許濤,以四十七歲之齡登上TVB主席之位。

 


黎瑞剛一五年四月入股TVB成為股東之一,許濤亦隨即獲委任為TVB非執董,憑着熟悉財務及善於溝通,被視為黎瑞剛「心腹」。今次TVB人事改組,有指係源於「星美債券」風波。話說陳國強主政期間,購入兩筆星美債券,分別係一點八億元嘅無抵押定息債券,以及六點五億元以戲院抵押嘅可換股債券。但後來星美陷入財困,TVB最終需為呢項投資錄得巨額損失,有傳TVB背後嘅基金公司曾有不滿,不過經許濤溝通後明白並非惡意狙擊。
許濤今次代黎瑞剛續掌大局,吃重地位不言而喻。至於升任副主席嘅李寶安,亦係呢次人事變動嘅焦點之一。董事局雖已改朝換代,但李寶安地位不跌反升,消息人士透露,同李對本地電視業務熟悉有關,亦有穩定軍心作用。
到底換主席後嘅TVB會係點?消息人士續分析:「如果TVB只限制喺香港發展,市場如此飽和下好難有突破。有必要將市場轉移到境外,包括內地同海外。所以近年TVB力谷『TVB Anywhere』、『myTV SUPER』,聽講????家約有九百萬用戶,高層都希望繼續朝多媒體方向發展。」
TVB製作嘅資源同檔案庫亦係兩大煞食賣點,事實上坊間可以自行製作咁多節目嘅娛樂公司其實無乜。早前佢哋重金禮聘楊千嬅回巢,拍攝劇集《多功能老婆》,叫好又叫座,正好係一個新嘗試。

黎瑞剛(左)只保留非執董一職,李寶安(右)則更上一層樓,接任副主席。