醫生賣樓頂硬上

香港經濟有幾重創，醫生H的故事恐怕只是冰山一角。佢係生育科權威，平日單做內地客人工生育都做到手軟，排一個症閒閒地等幾個星期。自去年反修例事件開始，佢診所所屬地區屢次成為衝突中心，客人去唔到或者索性唔去，更要命是內地客完全停晒預約，診症數量急遽下跌。過完農曆年後又來個新冠肺炎，連診所運作都要停埋，前前後後無咗成半年生意。
診所位處旺區，租金加埋人工、燈油火蠟，聽聞每個月要蝕成五十萬。為咗要頂住間診所，醫生H之前賣咗個幾百萬嘅單位，最近又再賣多一個，積多些少現金在手，因為佢睇唔到自由行會復甦到反修例事件之前，擔心有排捱。以前佢只係做生育諮詢都夠食，封咗刀唔執仔，不過現在咁環境，都要重出江湖。
早前有新冠肺炎病人曾到醫生診所林立的中環連卡佛大廈（見圖）睇醫生，新聞一出該大廈立即水盡鵝飛，病人行人都止步；加埋後來又出現蘭桂坊感染群組，令中區更加死靜。醫生都話，中區醫生樓租金絕不便宜，無一個星期生意都好大件事。難怪早排醫學會會長何仲平都要走出來替私醫振臂高呼，想政府幫一幫。

 

疫情下影響好多人暫時唔去診所，有些私家醫生索性暫時休息，直到這個星期疫情稍見緩和，積壓的預約立即塞爆。不過好多醫生話，這一階段只是虛火，因為全部是本地病人覆診，沒有了自由行，難以回復往日旺爆場面。長遠來說，那些看準自由行需要而開的體檢中心、專科中心等，難免面臨大執位。有些醫生就化零為整，傾緊幾個醫生夾租診所，分擔姑娘人工、雜項等開支，無咁重皮。
私家醫生冷清，公院則是另一個畫面。有公院醫生話，唔少病人在疫症高峰時期驚感染怕去醫院，一直拖延治療，以中風為例，佢話病人以前好多血管塞少少已嚷着入院，????家入到來時，條血管往往已塞咗大半；又例如心臟病，都係拖無可拖到最後一刻，才去醫院處理。
香港醫療水準一流，因為有市有價，費用相比其他地區亦屬不菲，今次面臨雙重打擊，從前的「星球醫生」（一星期賺一百萬），看來都要落番凡間。