為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2020 年 05 月 01 日

黃店五一大晒冷 發起人林瑞華被消失

泛民喺九月立法會選舉欲乘勝追擊,功能組別嘅頭號目標係飲食界一席。由三百多家黃店組成嘅「黃店聯盟」,疑不甘被公民黨操控,有意另覓人選,力撼身兼「香港中小企食店聯盟」召集人嘅公民黨成員林瑞華。
黃店內訌近日再升級,有二百多家「黃店聯盟」合共夾了六位數字嘅真金白銀,將喺五月一日登報紙全版廣告,大晒「黃店」名單,表面上是聲討政府抗疫不力,但心水清嘅人就發現,一手促成「黃店」埋堆、又積極拉攏「黃店」登記做選民嘅林瑞華,就喺聯署名單上被消失。
有知情人士話:「好多人覺得佢只識抽『黃店』水,疫情期間一味開記者會做騷,我哋喺限聚令下頻頻被巡查,佢幾時有代過我哋發過聲?公民黨有乜資格代表我哋?」
有「黃店」老闆更加咬牙切齒力數林瑞華不是,「好似前排食肆缺口罩、缺消毒用品、缺探熱槍,小店老闆喺最緊張嘅時期不停地四圍撲,幾時見林瑞華幫過手?你唔發覺佢每次出來開記招,只得幾間『黃店』老闆撐場,佢號召力有幾高,大家心照。」
據知公民黨高層都收到風,曾私下搵「黃店聯盟」傾密偈,游說佢哋讓路畀林瑞華,知情人士透露:「黨內高層都知林瑞華無乜人氣,派佢出選可能食白果,但因為黨魁楊岳橋力撐,幫口話林瑞華好勤力搵黃店登記做選民,高層聽完後惟有勉強答應繼續撐。」
識睇眉頭眼額嘅楊岳橋於是暗中開始發功,除拍住開火鍋店但無乜人識林瑞華行「孖咇」,四出叫「黃店」持牌人登記外,仲碌埋人情卡,搵埋老死黨友陳淑莊幫手做「左右護法」,為林瑞華「加持」。可惜佢哋早前爆出陳淑莊同林瑞華公然違反「限聚令」,喺一間酒吧聚集「開會」,醜聞一出令更多「黃店」決定跟林瑞華割席。
今次「黃店聯盟」登聯署聲明唔預林瑞華,到底聯盟會派邊個同佢爭?人稱「渣哥」嘅譚小環老公蔡強榮,月前喺社交網高調話會代表黃店出選,及後澄清係愚人節開玩笑。據知聯盟內部仍未敲定人選,但「一定唔係林瑞華」。 

「黃店聯盟」代表不滿公民黨為飲食界選舉頻頻抽水,登頭版聯署都唔預林瑞華一份。

 

 

 

被「黃店聯盟」排擠嘅林瑞華無視限聚令,相約陳淑莊喺酒吧「開會」,結果搞出大頭佛。

 

譚小環(右)老公「渣哥」蔡強榮月前突然殺出話要參選,及後澄清係開玩笑。