為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 陸叔開CHAT 2020 年 04 月 22 日

陳永陸

生活是很個人化的態度,人稱「陸叔」的著名財經股評家、兼投資策略顧問,用輕鬆心態,與跨界別嘉賓及以時事專題,去打開財經及以外的話匣子。

停課不停學

我中七開始兼職幫學生補習,當時主力補附加數和其他理科,入大學後一直繼續,但補幾個學生要走嚟走去覺得太浪費時間,於是游說其中一個學生借出地方,等其他同學集中一齊上堂,補習費可以平啲,我又慳啲時間。當時補習唔流行,補習社更加未出現,諗返轉頭我呢個安排可算係補習社雛形。
現時香港補習社成行成市,而且好多全職補習老師。其中遵理學校創辦人梁賀琪(June)同我一樣,都由讀書開始兼職補習,畢業後原本有全職工作,但因補習口碑及生意好,決定轉為全職補習老師。當時香港只有兩所大學,大部分畢業生都有高就,因此好多補習老師都係兼職性質,June全職補習可以話係破天荒。

七十年代補習天王陸叔同 精英匯主席梁賀琪(June)(左)大談香港補習行業發展。

 


「遵理」好多人識,點解上市用精英匯集團(1775)呢個名?June解釋,公司由補習社起家,但一路發展,加入幼兒教育及海外升學顧問等業務,於是決定以「精英匯」個名上市,希望能代表公司不同範疇業務。
講返公司歷史,遵理在一九八九年創立,最初在元朗租地方開設「津理」語文商科學校,即係遵理學校前身。當時仲係會考及高考年代,同現時DSE唔同,選科係文、理、商三揀一,冇得自由配搭選修科。June大學主修翻譯,係文科人,而另一創辦人伍經衡(Richard)則係理科人,兩位都係補習社台柱,咁啱可以文理互補,令招生更容易。
現時補習社有監管規例,但早期相關法規未完善,令經營存在灰色地帶。June坦言早年曾被警告無牌經營,因此在行業出現整合前已正式註冊分校。九十年代政府加強打擊無牌經營團體,行業汰弱留強。千禧年代行業競爭白熱化,逐漸變成幾間大補習社佔據大部分市場,遵理係其中一間。
千禧年代開始出現唔少補習天王天后,個個都靚仔靚女,但June認為呢個係外界誤解,覺得要靚先做到補習老師。佢笑言唔覺得補習老師特別靚,只係穿着要體面,保持專業形象,令學生專注聽書。作為補習老師最重要都係講實力,講求演講能力、對公開試熟悉程度及攞分能力。
學校因新冠肺炎而停課,教育局更取消DSE中英文口試,令學校及學生忙於應對。公司上年社會事件開始已推行網上教學,因此藉着上次經驗,疫情來臨用咗約一星期就將教學搬至網上,實現停課不停學。有人覺得香港網上教學方面行慢咗,June認為兩者相輔相成,雖然網上教學方便學生亦可以慳返筆租金,但綫下補習仍然無可取代。
公司三月份公布截至一月底止半年業績,收入跌一成,至一點九四億元(港幣,下同),主要由於私立中學輔助教育服務收入減少;純利下降兩成七,至一千九百八十萬元。疫情下唔少業主自願減租,共渡時艱,公司續租時亦會同業主商討減租,以降低成本。另外,疫情下企業減少招聘,相信有助公司吸納人才。