為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2020 年 04 月 08 日

違「限聚令」 陳淑莊林瑞華搬龍門狡辯

疫情嚴峻,市民幾唔方便都要遵守「限聚令」,偏偏公民黨立法會議員陳淑莊同黨友林瑞華就闊佬懶理,日前一行四十多迫喺深水埗一間酒吧內聚會,涉嫌違反「限聚令」。陳淑莊事後發聲明「狂兜」,聲稱當時用議員身份「開會」,可獲豁免。
但係佢話口未完,政府就發稿表明議員喺議會以外其他場合,參與或組織群組聚集,不屬獲豁免嘅群組聚集。呢巴摑得真係應,即係話陳、林等人當晚嘅活動,有可能違反「限聚令」。
政圈更加即時議論紛紛,部分建制派議員批評做得議員應以身作則。行政會議成員張國鈞批評陳淑莊以議員身份開會可獲豁免嘅說法有問題,「法例條文字眼寫得好清楚,只有當進行立法會嘅程序先可獲得豁免。如果話因為議員要進行會議不論地點都可以,就會令議員變相着咗黃馬褂,唔使守法,咁係絕對唔公平。」
工聯會立法會議員陸頌雄亦批評陳淑莊對抗疫持雙重標準,「佢之前喺工務小組上聲嘶力竭罵政府抗疫不力,轉頭同幾十人一齊去酒吧聚會,完全係寬己嚴人,佢應該向市民道歉,唔好再死兜啦!」
對陳淑莊辯稱去酒吧是為了開會,陸質疑做法「怪怪哋」,「深夜十二點仲開會?有無議程先?我唔知佢有沒有飲酒,但佢身為大律師無理由知法犯法,如果係誤墮法網嘅話,咁佢理解法律嘅能力係好不堪。」
陸頌雄認為若有人違反「限聚令」,有關部門需作出調查並執法。至於陳嘅有關言行有否違反誠信,他認為應就事件成立獨立調查委員會,「做議員唔係應該以身作則咩?佢咁做會畀公眾一個錯誤訊息。」
陳淑莊用「開會論」來狡辯,佢黨友林瑞華亦急不及待「搬龍門」,佢喺社交媒體發文話「明明已經下半閘停止營業」,但又補多句「明明已移離客人並隔開會議範圍」,停止營業但又有客?即係明明自己犯法自己搬龍門。
本身係火鍋店老闆嘅林瑞華,去年牽頭成立中小企食店聯盟,有意搶奪立法會飲食界個位,近排經常同陳淑莊拍住上,但係出師未捷先踩界,令佢誠信大打折扣。

警方接報有人疑違反「限聚令」,即時到場調查。

 

陸頌雄批評陳淑莊知法犯法,誠信成疑。

 

陳淑莊同四十幾人去酒吧聚會後,深夜乘的士離開。

 

林瑞華事後稱酒吧已下半閘停止營業,但轉頭又話「已移離客人並隔開會議範圍」,講法前後矛盾。