新冠肺炎環球疫情愈見嚴峻，早前曾往外地避疫或旅遊的名人，近日都紛紛返港；但仍有部分選擇留在海外抗疫。在此作戰時期，出走避炎又好，靜觀其變又好，還是宅在家中最安穩。

兩夫婦與兩名兒子搭地鐵，享受家庭樂。

梁家玉留英抗疫

音樂人雷頌德與Mark嫂梁家玉（Jade），於前年一家五口移居英國倫敦，在IG都不時見到Mark嫂晒英國靚相，除了煮飯仔，她得閒就去放狗、做Gym，生活寫意。近日英國新冠肺炎疫情嚴重，很多海外留學生都返港避疫，但繼續留英的Jade則表示，現時除了外出買食物及生活必需品外，其餘時間都會留在家中，未有打算返港。
「飛嚟飛去仲高機會中招啦！呢個時勢無得話唔鎮定，o依家全世界都有，最緊要守規矩，除咗家人，呢段時間我哋真係咩人都唔見，買完餸返到屋企，我哋會戴口罩，驚自己中招嘛！之前都會出去食吓飯，o依家餐餐自己煮，我就試吓煮多啲新菜式，無咁悶囉！其實我哋o依家同好多香港人無分別，都要安份守己，留喺屋企。」

閉關都要勤做運動，才可增強抵抗力。

網傳英國不少地方都出現搶購物資的情況，Jade就指，實際情況並非傳言中那麼恐慌，「超市會不停返貨，一啲清潔用品會較搶手啲，例如廁紙、清潔劑之類，不過早兩日我去入貨都買到，就算今日買唔到，過幾日都會買到嘅！通常我會買定三、四日嘅食物同用品，咁就可以出少啲街。不過，口罩的確係比較缺貨，好在早前朋友喺香港寄咗俾我，等我無咁徬徨。
「如果超市太多人，佢哋會要求啲人喺外面排隊，免得聚集，啲人都企得好疏，同埋見多咗本地人戴口罩，防疫意識已經好咗嘞，買完嘢返屋企，我會先消毒，都做足o架喇！希望疫情快啲過去，大家回復正常生活啦！」
小朋友方面，Jade指三月份已經開始停課，哥哥雷鳴已上中學，用視像上堂；細佬雷響就上網做功課，做完要準時交給老師。最近開始放復活節假，就可以休息。「Home schooling都幾忙o架，我哋要教小朋友做功課，唔吼實佢哋，就會作反o架嘞！」

 

宅在家中，Jade常鑽研新菜式，豉椒炒蜆加上眉豆花生雞腳老火湯，很有港式情懷呀！