為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2020 年 03 月 25 日

立會醫學界選戰熱身 何柏良被指黑馬

多個立法會功能界別近月揭起戰幔,藍、黃陣營各自密謀搶灘,一向唔算鬥得激烈嘅立法會醫學界別,今屆亦罕見出現爭崩頭。上屆已傳過有心參選嘅港大感染及傳染病中心總監何柏良,最近盛傳會以黑馬姿態出嚟選,仲話呼聲甚高。
何柏良以往畀人「偏藍」感覺,○八年曾參選立法會。不過近年佢路線有變,對政府又砌又鬧,句句有骨,最激莫過於早前公開反駁政務司司長張建宗講嘅「疫情已受控」論,批評香港政府領導層「未醒」,挑機言論贏得唔少「黃絲」醫生掌聲,不少人有意推舉佢參選九月立會醫學界選舉。
事實上何柏良近年確係人氣急升,去年尾醫務委員會就兩個醫生委員席位舉行直選,競逐連任嘅何柏良拍住醫學會前會長蔡堅,以超過五千票以大比數成功連任,揮低港大深圳醫院院長盧寵茂,以及私人執業皮膚科專科醫生陳衍里。
空穴來風未必無因,何醫生近排就新冠肺炎疫情,頻頻好肉緊咁發言,仲拍片教人戴口罩,又整埋WhatsApp抗疫貼紙,上周更走得比政府專家前,提倡宵禁抗疫,曝光率仲高過現屆嘅立法會醫學界議員陳沛然。就何柏良到底係咪有意參選九月立會,本刊向佢查詢時,佢回覆話:「絕對不會參選,亦不會考慮參選。」雖然答得斬釘截鐵,但有人推測佢仍有轉軚機會。
至於業界盛傳現任醫學界代表陳沛然亦無退意,希望冧莊;還有一班藍絲醫生,因不甘「被代表」,有意派自己人爭番個地盤,令選情出現三國鼎立之局。
藍絲醫生組成嘅「醫護誠信同行」更被看高一線可以出嚟爭,原因係月前有黃營醫護發起罷工,佢哋馬上聯同香港私人執業專科醫生協會組成「雷霆救兵」,成功號召近二百名醫護到醫管局增援,呢仗戰贏得唔少前線醫護加分,覺得佢哋「集氣」能力唔低。
而呢個陣營中有實力出戰嘅,就係香港私人執業專科醫生協會會長郭寶賢,以及「醫護誠信同行」林哲玄,兩人最近都好活躍,不時就醫療政策發言。

去年以高票連任醫委會選舉嘅何柏良近日因高調抗疫,被視為立會選舉嘅黑馬。

 

各路人馬部署挑機,陳沛然尋求連任將面對重重考驗。

 

 

 

藍營也有意派人參選欲奪回立會陣地,郭寶賢(上圖)同林哲玄(下圖)被指呼聲甚高。