為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 陸叔開CHAT 2020 年 03 月 25 日

陳永陸

生活是很個人化的態度,人稱「陸叔」的著名財經股評家、兼投資策略顧問,用輕鬆心態,與跨界別嘉賓及以時事專題,去打開財經及以外的話匣子。

七十年代MT點Work?

香港不少大學生希望進入企業MT programme,其中有畢業生希望增廣見識,亦有年輕人覺得做MT等於fast track事業發展。事實上近年企業亦非常注重實習生計劃,高薪聘請兼投放好多培訓資源,以培養下一代管理層,以及希望能為公司注入新思維。
我見網上有好多資訊介紹邊份MT工最受學生歡迎,各大企業入職要求,以至應徵和面試攻略等,好似加入實習計劃就係事業目標。做MT確實係職業生涯好開始,我自己在七十年代做MT亦係畢生難忘嘅經驗,但記住呢個只係「開始」,日後事業發展一樣要靠自己嘅學習心態和工作態度。
今時今日企業揀MT會經過筆試、面試、小組討論,甚至個性分析,可謂過五關斬六將。一九七三年,我應徵滙豐見習主任,當時唔叫MT,叫做Regional Officer Trainee。記得當年寄咗份求職信,好快就接到通知要去舊滙豐總行面試,中間唔需要筆試,我冇諗到咁快有得見,趕唔切做西裝,於是要問人借西裝去面試。當時係一位外籍女士見我,有人估一定問啲好刁鑽嘅問題,事實並唔係,佢只係問吓我讀邊科、家庭情況等,然後就叫我落樓下銀行醫生處驗身,驗完冇問題就可以返工。我都唔太清楚主考官請我嘅原因,成個面試除咗考吓英文之外,冇問過我銀行業相關問題,亦冇討論經濟時事等。但今日諗番,請我其中一個原因,可能係我夠誠懇,和表達出對呢份工有幾重視。

陸叔(右)在滙豐(後)度過MT歲月。

 


當年滙豐只係請約十個見習主任,呢份工得來不易,但唔好以為好高薪,其實當年入職人工一千六百大元,而且三年實習期內係冇人工加嘅。七三年千六蚊係乜嘢概念?同政府EO2差不多,比較今日MT人工絕對唔算筍,不過挨過三年人工翻倍,就同AO睇齊。
三年間銀行調我去不同部門,最後仲要去瓦魯阿圖工作半年,以及通過二十四日外展訓練,包括單獨在荒島過兩晚至完成實習。七十年代香港只有外資企業至有管理實習職位,對於滙豐嚟講我哋亦屬最早一批大學生進入銀行工作,當時部門主管多數係英國人,下面大部分都係中學畢業生,我哋入到去有啲另類,而由於我哋係實習完準備升Officer,所以部分同事會覺得大家有競爭。嗰個年代英資機構階級觀念好重,連洗手間都有分主管和Officer用,以及一般職員廁所,上到Officer級係重要晉升,所以原有職員難免會擔心被取代。去到部門,主管和同事唔會主動教我,要自己唔怕瘀四圍請教人,過程中我學會謙卑。另外滙豐會請香港銀行學會嚟做培訓,幫我哋考專業資格。因此,三年好似好長,其實真係獲益良多,而且令我學會耐心。
當年MT職位主要請本地大學生,現時同學要同世界各地畢業生競爭,確實比我哋更難。但如果成功獲聘,企業好多時會為MT鋪好路,又有mentor指導,逐步培養。我寄語後生一代,競爭咁大,咁難至入到實習計劃,就要好好把握,唔好着眼於Work from Where,反而應該問自己Work with What。我MT生涯所學到最寶貴嘅知識就係點樣Work with Devotion, Patience, Modesty……