為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2020 年 03 月 18 日

捨田少棄「自由」 李梓敬挑機容海恩

嚴峻疫情無阻各路人馬部署九月立法會選舉,被視為自由黨新星、深受田少器重嘅前深水埗區議員李梓敬為出選,決定離開田少轉會。日前佢忽然宣布退黨,並過檔新民黨參加黨內嘅新東選區初選。
政圈流傳關於佢轉會嘅真正原因,同爭出線有關。喺政壇打滾多年嘅李梓敬對立會之位一直戰意高昂。月前佢落敗區選後,一度傳佢叠埋心水做律師,但未幾再傳佢希望九月博多一鋪,可惜神女有心,襄王無夢。有傳自由黨今屆想集中資源力保幾位舊將連任,個幾月前通知佢未有打算派佢攻城,李梓敬知道出線無望好無癮,四出尋求新跑道。新民黨葉太出名鍾意幫後生仔起機,有人敲門又點會「Say No」?
不過,李梓敬先要參加黨內初選,並挑戰該黨現任新界東立法會議員容海恩,贏咗先可以正式出選,佢肯接受挑戰,明顯係唔怕輸,盡地一煲。對於容海恩,前排佢為咗撲口罩非常之忙,但仍有傳佢畀黨內高層嫌佢撲罩撲得唔夠快。如果傳言係真,睇怕佢想爭九月出線的話,會有難度。

李梓敬(右)曾是田少愛將,兩人更並肩出戰,可惜如今師徒情不再。

 


有口痕友話,大家唔好忘記,新民黨副主席黎棟國,話晒都係前保安局局長,講吸專業藍絲票,叫座力隨時高過李梓敬同容海恩,佢都有機會以黑馬姿態出嚟選。
講番李梓敬,佢嘅從政路可謂波折重重,一六年立會選舉,自由黨喺地區直選全軍覆沒,當時田北俊喺新東名單排第二位,為李梓敬「抬轎」,可惜呢張名單只拎得二萬幾票,同當時取得新東最後一席,獲三萬六千票當選嘅容海恩相比,依然相差過萬票。但李梓敬同田少嘅師徒情仍在,更主動協助田少管理facebook專頁,係幕後嘅「田毛毛」,不時就政治熱話抽水,點擊率極高。
不過新民黨經過去年區議會選舉後全軍覆沒,新東更是「零樁腳」,即使李梓敬最後成功爭到出線權,吸票勝算亦大打折扣。本刊曾致電李梓敬查詢參加初選嘅最新情況,但直至截稿前仍未有回覆。

新民黨主席葉劉淑儀曾笑稱自己幫唔少年輕人「起機」。

 

容海恩遇上黨友及李梓敬挑戰,要保住席位難度唔細。

 

容海恩遇上黨友及李梓敬挑戰,要保住席位難度唔細。