為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 陸叔開CHAT 2020 年 03 月 18 日

陳永陸

生活是很個人化的態度,人稱「陸叔」的著名財經股評家、兼投資策略顧問,用輕鬆心態,與跨界別嘉賓及以時事專題,去打開財經及以外的話匣子。

醫護人才配對平台紓短缺

最近經常留意醫療健康議題,所以好鍾意搵相關行業人士傾偈,上星期就請咗百本醫護(2293)主席及行政總裁奚曉珠(Winsome)上節目,由公司業績講到醫護行業。公立醫院人手一向緊張,醫管局報告上見到,二○一八/一九年度整體醫生流失率達百分之六點四,創十年新高,全職護士亦流失百分之六點一,都係破紀錄。新型冠狀病毒傳播仍未完全受控,加上人口老化,醫護人員需求只會有增無減。
Winsome本身係香港醫護學會會長,對醫護人手短缺問題當然掌握。百本正係針對呢個痛點提供醫療機構支援方案,運用平台配對醫護人員及客戶,紓緩醫院短期人手荒,特別係突發醫護需求。
另外好多家庭有老人家或其他人需要特別照顧,一般家傭未必能跟得上。公司嘅私家看護方案,以服務個人為主,有家居上門護理、陪診、二十四小時私家看護、專業上門護理,以及復康評估等服務。亦有為住喺護老院嘅老友記提供私家護理服務,有專人照顧可以更貼心,而家人亦較安心。

百本醫護主席及行政總裁 奚曉珠(左)。

 


根據呢個營運模式,公司人才庫係最重要嘅競爭優勢。百本建立人才數據庫多年,目前已有超過兩萬名合資格專業醫護人員登記成為會員,包括醫生、護士、註冊中醫師、治療師及健康護理員。公司會核對資歷和執業資格,再確認可委派工作範圍,並先用系統篩選,再以人手配對,希望能切合客戶需要亦幫會員搵到合適工作。
Winsome解釋,以前會員多數以兼職身份提供服務,在工餘時間至可以接工作,但現在大部分會員都已經轉為全職身份。既然諗住做全職,點解要喺平台「搵散工」?我覺得呢點都反映現代人鍾意自由自主嘅心態。在平台接工作有更大彈性,一來可以方便自己安排工作時間,毋須跟醫院編更;二來可以自由選擇工作種類和地點。工作模式受歡迎,令公司有能力儲備更多人才,並且夠機動,可以快速幫醫院補充短期人手缺口。當然醫療系統一定要有穩定嘅全職醫護團隊,而人才平台可以作出彈性配合,發揮互補作用。
截至上年十二月止六個月內,公司營業額增加百分之六點二,至三千七百五十萬元(港元,下同),純利升百分之十點五,至一千六百九十萬元,中期息二點五仙。隨住醫護需求增加,相信醫護服務行業前景應該頗為穩定。
內地同樣出現人口老齡化問題,一九年年底六十五歲及以上人口達一億七千多萬人,佔總人口一成二六,按年上升零點七個百分點。勞動年齡人口減少,出生率更為七十年來最低,預計會進一步增加醫護需求。我問公司有冇計劃北上?Winsome坦言已經研究內地市場一段時間,見到目前市場較為分散,而且只有護工,未見有公司整合醫藥人員分派服務。佢認為醫護人才適宜本地化,而且香港本身都缺乏醫護人員,香港醫護成本亦較高,將人才引入未必符合成本效益,不過佢有考慮將公司管理及品牌引入內地,以軟實力進攻更大市場。