為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 娛樂放題  > 娛樂追擊 2020 年 03 月 05 日

唔想將秘密帶入棺材 洪朝豐爆跟寶詠琴委屈舊戀事

今年1月5日「登六」的洪朝豐,形容60歲大晒,在社交平台宣佈「出櫃」!99年跟已離世17年的香港富婆寶詠琴高調相戀3年(中間曾分開及復合),曾結過婚有兒子,跟5個男仔拍過拖的洪朝豐由雙性戀變同性戀,坦承曾經蒼海,尤其被寶詠琴傷害最深。經過21年沉澱,豐豐冷靜地將埋藏在心底多年的秘聞揭開,「佢(寶詠琴)只畀過4000蚊現金我『責袋』,我同佢一齊唔係貪佢錢。」

經歷過抑鬱狂躁症、舌癌及淋巴癌,洪朝豐話自己死過翻生,唔想將守住20年的秘密帶入棺材,對寶詠琴生前公開指控他,話他係同性戀者,為咗錢埋她身,洪朝豐委屈地有嘢講:「嗰3年嚟,我撇咗寶詠琴兩次,又唔見啲人讚我有骨氣?梗係話我為咗貪佢錢同佢一齊,而且焦點永遠落喺我有精神病時,指罵寶詠琴『一隻手指捽死你』、要求提供100萬元性服務費!最唔公平係,男人同女人嗌交,永遠係男人唔啱,有錢同窮人吵架,又係窮人做錯。」

洪朝豐形容60歲大晒,且3次死過翻生,唔想再受委屈落去,所以大膽將陳年秘密公諸於世,因為至今依然好多人怪責他。

 

寶詠琴曾道歉

講到錢,豐豐好敏感並強調同寶詠琴第一次分手時,係賺緊200萬年薪,「直至2000年3月寶詠琴要求復合,雖然嗰段日子我生意失敗冇晒收入,佢只係畀過4000蚊我『責袋』,我亦冇佢附屬咭,當時食佢住佢,佢有時買靚衫畀我,出錢同我去旅行,根本連4000蚊都使唔到。第2次分手後一年,寶詠琴終於肯對我講:『對唔住!』我亦原諒咗佢,喺寶詠琴最後歲月,我不時喺醫院同佢傾心事,但我只係得到佢司機送嚟嘅靚羊扒,因為佢知我鍾意食羊,直至佢離世,我屋企個雪櫃入面仲有一塊靚羊扒,我珍而重之唔捨得食。」

雖然同寶詠琴嘅往事令他身敗名裂,但洪朝豐冇後悔,更多謝寶詠琴令他變得堅強,就算喺人生路上再跌倒,都爬得返起身。

 

2003年寶詠琴出殯時,豐豐神色凝重去靈堂致祭,因為寶詠琴臨終前半年已向他道歉,他經已原諒咗對方。

 

一拖二去旅行

洪朝豐又自爆:「第一次我喺郵輪提出分手,佢要脅我話『回港開記者會,到時講畀記者聽,你係Gay!』佢想用同性戀者嚟要脅我,摧毀我事業同形象,呢場戰爭係由佢發動攻勢在先,只係大家見唔到。」豐豐表示自己係潮州怒漢只怕父母,所以必定同佢死過,反正自己係爛泥。「我從冇呃過佢,由始至終,同佢交往前我表明另有男朋友,佢係接受我哋三人關係,我哋三人仲一齊去過上海、杭州、蘇州、北京、西安,我哋三個會互相關心,佢兩個都好愛我。」問他可會提供三人行相片作證?洪朝豐卻一口婉拒:「唔信就算,我要保護我前男友。」

「喺呢件事上,反而佢前夫劉鑾雄就睇得穿,當年佢公開力挺我話:『阿琴做人唔好咁毒,洪朝豐係好人嚟嘅。』當時大家未必參透當中玄機,但以我理解,劉鑾雄係睇得出寶詠琴想將我置諸死地,所以提出呢個忠告,雖然我唔識劉鑾雄,但咁多年之後,仍然好多謝當日劉鑾雄出手。寶詠琴會『愛之欲其生,惡之欲其死』,不念恩情,無情無義,佢根本唔識愛人。」

不甘心被支配

問到關係如此差,點解會復合?豐豐解釋:「第2次復合由寶詠琴要求,佢話好掛住我,驚我凍親,要攞啲棉被落嚟我舖頭畀我,我一時間受感動,唯一開出復合條件,唔可以好似以前咁有正常嘅性關係,因為我對住佢唔能夠再完全放鬆。當時佢話:『唔緊要,我哋攬吓錫吓就可以。』可惜復合年半再喺紐約旅行期間分手,因為我哋性格有差異,佢唔只要求十全十美,仲要支配住一個人,仲屈我狂躁症病發,要求我加藥。」

洪朝豐與前妻葉桂好結婚6年,育有一子:「離婚前一年我暗交男友,背叛咗佢,但佢係我天使,唔只失意時畀份工我做,????家仲住我屋企照顧我。」

 

豐豐喺仰光佛塔前留影,強調唔再忍辱負重:「香港好多偽善嘅人會抨擊我,話:『人都死咗,就算佢係錯,講嚟仲乜?』嘩,乜都你哋講晒啦,我唔忍都忍咗20年啦,仲乜要將秘密帶埋落棺材?」

 

洪朝豐曾大病過3次,形容呢20幾年嚟過得好辛苦,有好大壓力。