為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 陸叔開CHAT 2020 年 03 月 05 日

陳永陸

生活是很個人化的態度,人稱「陸叔」的著名財經股評家、兼投資策略顧問,用輕鬆心態,與跨界別嘉賓及以時事專題,去打開財經及以外的話匣子。

舊地新遊

早排經常去深水埗、荔枝角、長沙灣一帶拍攝樓盤電視特輯,乘機舊地重遊。實際上,話係舊地新遊更加貼切,因為多日來嘅拍攝,令我有機會近距離接觸呢個新舊交融嘅社區,有全新感受。
以前深水埗、長沙灣有好多紡織、製衣、五金工廠。細個時媽媽經常去深水埗幫人車衫,會帶埋我一齊,佢開工時我會跟啲叔伯落樓下玩,好多時會去海傍游水。大家唔好覺得奇怪,深水埗何來沙灘?當時深水埗、長沙灣海傍嘅水好清,真係可以到此一「游」o架。呢家當然唔可以喺呢度游水,但我依然耐不耐會去幫襯下深水埗大排檔,當時成日去嘅魚蛋粉檔仍然營業中,可以話係兩代人嘅回憶。
以前深水埗、長沙灣俾人感覺係「舊香港」,但政府近年積極活化區內建築,將藝術文化、時裝、設計等元素融入社區。拍攝其中一日我去咗賽馬會創意藝術中心,呢度由石硤尾工廠大廈活化而成,因為香港輕工業逐漸式微,單位丟空,於是轉化成為藝術村。中心係一百四十多個藝術家和文化團體嘅基地,不時會舉辦劇場及展覽活動,設有劇場、藝廊及創意工藝商店,各層都有特色展示空間。
荔園係唔少香港人嘅回憶,舊址對開呢家就係饒宗頤文化館。呢度有百幾年歷史,屬於三級歷史建築,前身曾經係檢疫站、監獄、傳染病醫院和精神病療養院。今日文化館內有旅館、茶室、餐廳、藝術館、展覽館,環境同內涵同樣古典優雅,我都去Cafe嘆咗杯手沖咖啡,的確係心機之作。

陸叔走勻深水埗、 長沙灣拍攝電視特輯。

 


講起歷史大家應該記得一九五三年聖誕節當日石硤尾木屋區大火,五萬居民無家可歸,促使政府興建徙置大廈,亦標誌香港公共房屋嘅開始。徙置區已大部分清拆,留低首八座活化成美荷樓,獲評為二級歷史建築,現時用作藝術中心及青年旅舍,入面亦設有公屋博物館,記錄五十年代起香港嘅社區發展和生活環境變化。
最近好多人去行山,搞到大排長龍。呢區有個嘉頓山,可以話係深水埗「後花園」,由美荷樓旁行十幾分鐘可以上到去俯覽深水埗全景,最重要係可以從高角度欣賞嘉頓麵包廠。嘉頓一九三五年建立呢個青山道麵包廠,當時係區內最高建築物,亦可以話係本區標誌,約人就在此集合。嘉頓麵包廠係香港僅有為數不多嘅包浩斯設計風格建築,現列為二級古蹟。唔想爬山可以好似我咁去公園。拍攝去咗南昌公園和荔枝角公園,嶺南風設計,地方好大,當日見到有人賞花、消閑、運動,各適其適。
深水埗、長沙灣亦係重建「重鎮」,區內有超過十個重建項目。隨着市民對生活質素要求提高,我見到新樓盤綠化都做得好好,令呢個社區更宜居。我個人好鍾意舊區獨有嘅人文風景,而活化、重建就為舊區注入新動力。重遊舊地,勾起少年回憶,更開心係見到區內新舊完美結合,互不排斥。