為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2020 年 02 月 26 日

港罩廠競賽 鬥快投產爭第一

全城缺罩下,商界及各路人馬一窩蜂擁去搞香港口罩生產線。競賽三個幾禮拜後,部分搞手聲稱三月可以開賣。但等待口罩真係一日都嫌多,已有私人企業宣布,首批港產口罩已經面世,每個售價兩蚊!
仁濟醫院前主席鄭承隆早前聯同新思維創黨主席狄志遠,以外行人身份膽粗粗搞口罩廠,新作終於出世。日前佢哋更自己出面試戴自家製口罩,仲拍照影相擺上社交媒體。鄭承隆話,本周一已將首台口罩機運往一個擁有十萬級規格嘅無塵車間進行組裝,並正開始投產,「首星期嘅生產量係三十萬個,大約每日四萬幾個,預計稍後可以倍增至每星期生產七十萬個。」
至於幾十萬個口罩會點分配?據知部分將交畀政府同安老事務委員會主席林正財免費派發,亦會以每個兩蚊賣畀私家醫生、牙醫、獸醫同護士等,「已經有醫生落柯打訂幾千盒,稍後亦會聯絡十八區區議會主席,由當區區議員幫市民訂購。初步反應唔錯,荃灣區議會部分議員都話有興趣。」

自家生產嘅口罩面世,鄭承隆(後排左)同好友狄志遠(前排左)、黃俊瑯(後排右)即時做人肉測試。

 


現時買口罩最緊要防到病毒,鄭承隆話佢哋採用咗BFE99級別嘅溶噴布,首批口罩已分別交畀美國同廣州化驗所做化驗,「份報告要三、四星期先出到,但現時疫情嚴峻,商量後決定將產品同步推出市場應急。」
同樣參與口罩廠競賽嘅工聯會都唔執輸,何啟明日前戴上工聯會生產嘅口罩話,佢個罩係由工聯會兩位榮譽會長林淑儀同陳婉嫻親手縫製,別具紀念意義。何啟明透露,產品正進行品質驗證,預計兩周後完成,到時會免費派畀市民。
商人設立生產線,當然可以紓緩本地口罩荒。但屈指一數,現時幾路人馬真金白銀投產,更有專家研發緊可重用嘅換濾芯口罩,真係花多眼亂。不過疫情發展來去匆匆,往後需求唔夠大的話,隨時變攬炒,睇嚟政府要好好規劃香港嘅口罩產業,唔好一急就唔計成本效益亂批資助。

工聯會陳婉嫻(右一)落手落腳縫製口罩,「嫻姐」出品唔知大家又點睇?

 

工聯會生產嘅口罩做緊品質驗證,預計兩周後完成。