為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 陸叔開CHAT 2020 年 02 月 27 日

陳永陸

生活是很個人化的態度,人稱「陸叔」的著名財經股評家、兼投資策略顧問,用輕鬆心態,與跨界別嘉賓及以時事專題,去打開財經及以外的話匣子。

心慌慌買清光

近期香港廁紙搶購甚至搶劫事件成為國際新聞。新型冠狀肺炎爆發後,口罩差不多要去到北歐同非洲至買得到,而口罩和消毒用品等係防疫必需品,疫情未明朗下全球暫停輸出的確造成短缺,出現恐慌性購買(Panic buying)可以理解。但單憑傳言和屋企仍有存貨情況下仍去搶購米、即食麵、廁紙,就確實係二○一一年福島核危機後「盲搶鹽」事件翻版,當時香港鹽價上漲十倍,拍得住口罩價升幅。
恐慌性購買如何界定?字典定義係好多人突然購買大量某種貨品,一般令到價格飆升,而原因包括憂慮唔好嘅事情將會發生,貨品價格會急升(或當地出現極高通貨膨脹),貨品會短缺等。喺金融市場,恐慌性拋售可能較常見,但在市場情緒非常樂觀之下,有時投資者會出現「錯失恐懼症」(Fear of missing out,FOMO),一樣會觸發恐慌性買入。香港樓市亦出現過呢種情況。
有心理學家指恐慌性購買係出於自我保護及生存機制,由害怕死亡或疾病引發,可以話係求生本能。因此發生大型傳染病時,較易引發恐慌性購買,因為不確定性高而且關乎安危,令市民更易受傳言影響。其實「唔怕一萬、最怕萬一」嘅心態可以理解,但恐慌性購買不利社會,令真正有需要嘅人買唔到物資,積存過多日後亦可能用唔着而造成浪費。

單憑傳言和屋企仍有存貨情況下 仍去搶購米、即食麵、廁紙,就確實係二○一一年福島核危機後 「盲搶鹽」事件翻版。

 


為何人會集體做出不理性行為?心理學家認為人在極不確定時,腦袋主管情緒部分會「綁架」負責分析和詮釋行為嘅認知系統,誘發人嘅戰鬥或逃跑反應(Fight-or-flight),因此出現集體恐慌行為。從社會學角度分析,搶購行為亦可以用「自證預言」(Self-fulfilling prophecy)解釋。市民相信某一預言,因而影響和改變自身行為,最後反而令預言成真。
歷史上有不少有趣嘅恐慌性購買例子,好似一二年十二月廿一日係瑪雅曆法一個極長周期嘅終結,有人將呢個日期引申為世界末日,而且有唔少人相信,仲喺美、俄引發搶購潮,最終連美國太空總署都要出文和短片,解釋世界為何並冇完結。○八年奧巴馬當選美國總統,因為美國人相信佢會實行更嚴格槍管和增加彈藥稅,竟然觸發手槍搶購潮,有城市更加因為銷情太瘋狂而要「限購」。
最近睇到一篇報道,美國七十年代石油和部分物資短缺,清談節目《Tonight Show》主持講笑話全國廁紙將會短缺,結果真係好多美國人衝去搶購廁紙。其時店舖本來並冇缺貨,但因為大家大量入貨,結果自製短缺。當時一位女士發現嫲嫲竟然屯積咗幾百卷廁紙,同香港情況如出一轍。最後主持出面澄清消費者至冷靜落嚟,但今時今日呢類消息嘅傳播比七十年代更快更廣,要平息傳言難上加難。
一個心理學會於是作出幾項建議,雖然都係老生常談,但大家不妨參考下。建議包括要認同危機中每個人都有共通點和恐懼,停一停想想其他人面對恐懼點解會有如此反應,反省自己行為但尊重對方,最重要係唔好因為對方做法而產生敵意。疫情之下要注意健康,購買行為都要健康。