為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 陸叔開CHAT 2020 年 02 月 21 日

陳永陸

生活是很個人化的態度,人稱「陸叔」的著名財經股評家、兼投資策略顧問,用輕鬆心態,與跨界別嘉賓及以時事專題,去打開財經及以外的話匣子。

富可敵國的電影工業

今年奧斯卡頒獎禮曲終人散,最多人談論當然係韓片《上流寄生族》橫掃四個主要獎項,而我就好留意懷念年中過世電影人嘅片段,特別係老牌影星卻德格拉斯剛喺頒獎禮前過身,短片勾起不少兒時回憶。
我印象中第一齣去戲院睇嘅電影,就係佢主演嘅《風雲群英會》。呢齣電影一九六○年上映,有朋友問,當時我得幾歲點會有印象?呢位朋友真係too young,嗰陣我唔會睇正場,通常係遲幾年至去睇平啲嘅公餘場。呢齣戲令我從此愛上電影。
每年奧斯卡我一定捧場,即使要返工都會上網留意下,然後夜晚重溫整個過程。我好少追劇但如有時間每晚都睇一齣戲,奧斯卡最佳電影提名名單一出,我甚至會去搵晒嚟睇,然後自己揀選心水。
電影係藝術,亦係娛樂,更加係經濟支柱之一。根據美國電影協會最新(二○一九年)數據,美國電影電視工業共提供二百六十萬職位,支付總工資一千七百七十億元(美元,下同)。行業不但聘用製作團隊和演員,仲支持好多相關工種,甚至由電影引伸出產品生產和零售、主題樂園、旅遊等等,影響範圍甚廣。協會估計,一齣電影喺美國拍攝一日,可以為當地經濟注入二十五萬元效益。

南韓電影得獎,亦引起大家對亞洲電影業關注。亞洲除印度波里活和南韓外,另一正崛起的電影市場是中國。

 


至於更具體嘅經濟效益,協會舉例,假如呢個行業係一個國家,行業一七年總收入達二千二百二十九億元,當係GDP嘅話,同年喺世界排名四十四位,真係富可敵國。美國經常想減少對華貿易逆差,但電影行業就錄得一百七十億元出口,貿易順差達一百億元,呢個數字大過美國好多行業,包括電訊、交通、礦產、保險、健康產業等嘅順差。
今年《上流寄生族》突圍而出,我睇完都覺得齣戲好創新,相信對荷里活亦有衝擊。攞最佳電影時,團隊特別多謝南韓入場觀眾,我聽講南韓人的確好鍾意睇戲,過去十五年票房除咗一年微跌外基本都係上升,一九年達十六億元。
南韓電影得獎,亦引起大家對亞洲電影業嘅關注。亞洲除印度波里活和南韓外,另一正崛起嘅電影市場係中國。現時中國未係製片大國,但已經成為全球第二大電影市場,一九年中國總票房近九十二億元,雖仍落後於美國,但銀幕數逾六萬已超越北美。當然目前疫症擴散下電影市道可能會有跌幅,但中國市場潛力仍然優厚。上年內地十大最賣座電影中只有兩齣美國片,其他都係國產。中國市場無論電影或劇集,以前都係港產和美國片天下,國產作品能夠得到自己人捧場都經過多年學習和發展。我睇過一啲內地製作,可能並非賣座或熱播作品,但質素同概念都不俗,期望日後能打入國際市場。
奧斯卡當晚介紹最佳外語片前向多國經典作品致敬,包括五部華語片,其中有兩齣香港電影。香港電影業有過非常輝煌嘅歷史,見到中國和南韓市場發展,我希望能睇見港產片重振聲威。大家記得多啲捧場。