為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 娛樂放題  > 娛樂追擊 2020 年 02 月 14 日

麥浚龍展露大導霸氣

歌手出身嘅麥浚龍(Juno),一直恨做導演恨到發燒,直至一三年初試啼聲執導電影《殭屍》,部戲叫好叫座,亦證明佢嘅導演功力,唔只玩玩吓。兩年幾前,佢仲搵嚟影壇幾大卡士,包括:金城武、梁家輝、劉青雲、古天樂,合演佢執導嘅第二部作品《風林火山》,而部戲就預計今年上映,一部戲搞足幾年,肯定係佢嘅嘔心瀝血之作。
早前,東姑就喺中環嘅「大館」巧遇Juno,一行五六個人有男有女,個個都好似睇住Juno做「阿頭」,一班人不時左望右望,似喺度「睇景」搵緊拍攝嘅場地。而當日全身上下黑衫黑褲look打扮嘅Juno,睇落個樣非常認真,不時仲「敦」起個cool樣,指手劃腳向成班人講解,嚴肅得來,好有大導演嘅霸氣。
之不過,本性隨和平易近人嘅Juno,做完正經嘢,好快又變番「暖男」。東姑見男工作人員不斷用手機影低現場嘅環境相,Juno就拉埋另一個男工作人員試位,順便影合照。而毫無架子嘅佢,仲鬼馬咁擺晒pose,一時交叉腳,一時又鬥踎低作狀搶fo。其實,佢識得工作時工作,遊戲時遊戲,唔會食古不化一味死咕咕,跟佢搵食啲人,應該幾爽o架!

現場指揮若定嘅Juno,好有大導演嘅風範。

 

之後,兩個人對住鏡頭鬥踎低,個pose鬼馬得來有啲騎呢。

 

影完相,Juno仲上前圍埋去睇照片效果,嬉戲得來,佢對質素仍然好認真。

 

兩年幾前,Juno搵咗金城武、梁家輝、劉青雲、古天樂等,合演佢執導嘅第二部作品《風林火山》,部戲就預計今年上映。