為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 娛樂放題  > 娛樂追擊 2020 年 02 月 12 日

醫護囝囝食特敏福入Dirty team 麥潔文慶幸兒子無拍拖

好有勇氣 高大靚仔,做醫護的Bryan舉手入Dirty Team被網民激讚,麥潔文、江華好有福氣呀。

新冠肺炎疫情持續肆虐本港,不斷有新增確診個案,加上防疫裝備短缺,對前線醫護人員來說更添壓力,麥潔文(Kitman)跟江華的26歲兒子陳耀淙(Bryan)係大埔那打素醫院男護,因自願加入「Dirty team(抗疫隊伍)」備受網民讚賞,更大讚Kitman兩公婆識教仔。對此,Kitman謙稱:「大家言重喇,不過,呢排阿囝為咗抗疫情真係好忙,仲要食特敏福開工。」Kitman更指生得高大威猛嘅Bryan因為好忙,加上出入高危地方,單身更好!

投身醫護 Bryan天生一副明星相,加上有六呎高絕對可以入行做明星,但他選擇做醫護。

星級小孩 小時候的Bryan相當可愛。

有個做前線醫護嘅囝囝,的確有苦自己知,Kitman無奈說:「o依家我哋兩公婆都冇乜機會見到個仔,因為佢經常早出晚歸,見到面只係一聲hi一聲bye,而且仲要距離得好遠,大概客廳一頭一尾咁上下。佢每次喺房出嚟,會係whatsapp家庭群組度通知大家:『我出嚟啦!返工喇!我會行去邊度呀!大家都要迴避吓佢,佢仲要叮囑工人唔好入去佢間房度清潔,怕工人唔小心會染病,我哋仲要分段食飯。有時我會忍唔住,敲佢房入去叫吓佢,佢就好忟憎喺whatsapp話我:『配合吓好唔好?真係好危險喎,我唔想你哋都有事!』咁又喺嘅,佢要食特敏福嚟開工就知工作環境有幾高危啦!」

囝囝要冒感染風險打工,Kitman表示明白亦理解,「冇計o架,最重要做到佢想做嘅嘢啫。佢只係個護士仔,唔使發揮帶頭作用,佢自願入隊,舉手話『既然咁多人驚入去,咁我入去先啦。』呢方面佢心智好成熟,做到佢想做嘅嘢都戥佢開心,一日做醫護都預咗啦,就算唔係呢個病都有好多傳染病,擔心都唔係o依家,亦無需要太擔心同心痛。」Kitman唯有苦中作樂:「我哋兩公婆同囡囡陳薔天停學同停工,留喺屋企冇乜嘢做,有時三個坐晒喺客廳會同留喺房入面嘅Bryan視像,呢個做法唯一覺得幾得意嘅,都好特別囉!喺一片歡樂聲中進行,大家哈哈笑,開心吓就算。

回復單身 Bryan經常出入病房,連拖都冇時間拍,搞到回復單身。

爭取見面 江華唔忍心見個囝追更咁辛苦,變身uber司機送個仔返工。 

Kitman透露囝囝好少跟她講公事,同爸爸傾得比較多,因為江華o依家冇嘢做,見囝囝追更咁辛苦,會變身uber司機送個仔返工,乘機親子:「其實我唔係緊張大師,但阿囝不時提示我哋,話去人多聚集嘅地方,就算帶住口罩,但仍然用手去捽眼鼻呢啲舉動係最危險,要勤洗手,所以我唔會逗留街市咁耐,而且揀人少時間先去。阿囝做醫護會好審慎,我咪唯有配合吓佢囉。(女友有冇擔心佢?)」阿囝冇女友,佢o依家做咁高危嘅嘢,冇女友較好。」

對於Bryan行為獲網民激讚,教出一個乖仔的麥潔文說:「唔係驕傲呢回事啦,係醫護人員應盡責任,大家言重喇!其實咁都好嘅,帶正能量畀人,希望啲人積極啲抗疫。」目前麥潔文停晒工作配合全城抗疫行動:「教室經已停學半個月,唔想學生有任何傳染機會,相信每個香港人都要配合,喺呢個時候仲聚集好唔啱。喺廣州求學嘅天天本身放緊年假,佢好早就返咗嚟,但因為疫情影響廣州都要延長學校假期至另行通知,最快2月尾3月初。」

曾被隔離 早年Bryan曾被懷疑染上H7N9甲型禽流感而被送院隔離。

經常出鏡 小時候Kitman帶埋Bryan同小美及林憶蓮姨姨聚會。

喜歡音樂 Bryan有音樂細胞,自小愛音樂。

未能共聚 一家四口要待疫情過後才能共聚天倫。

關係好Close 一對子女由細到大都黐父母。

父母識教 Bryan冒感染危機入Team,唔少人大讚Kitman及江華有家教。