為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2020 年 02 月 12 日

口罩物資消耗異於平常 醫管局嚴查

公立醫院規定防護物資必須有三個月存貨,但今次爆發新冠肺炎無耐,多間公院嘅物資忽然嗌短缺,醫管局口罩嘅使用量更急增五倍,現時存量僅夠一個月用。「醫管局員工陣線」隨即以唔夠防護作理由發動罷工,有幾千名醫護以不同方式缺勤唔返工。
有傳局方高層一直留意到物資消耗得奇快,異於平常,已暗中調查。消息人士透露:「唔排除有人以扮有需要用為名,大條道理以密集式拎走醫療物資,甚或直接偷走,令物資庫存急速消耗,製造恐慌效果。」有指如證實有人涉偷竊,會即時報警;若涉及行為操守問題,亦隨時手起刀落炒人,絕不手軟。
近日網上流傳有閉路電視拍攝到一間公院嘅醫護順手牽羊拿走成盒口罩。事後證實「案發」於罷工前的一月二十七日,晚上十時十五分,現場係聯合醫院J座六樓的職員女更衣室。據悉該院有五百名女職員可拍卡進入使用,涉偷口罩的女子,有指係一名前線護士,而醫院亦已經報案。

網上流傳有閉路電視拍得一家公院嘅醫護疑順手牽羊拿走成盒口罩,院方已即時報警。

 


至於大大聲搞罷工嘅「醫管局員工陣線」,沒有見好就收,罷咗五日草草落幕,令唔少洗濕咗個頭嘅前線大呻。知情人士話:「醫管局高層今次企得好硬,拒絕向『陣線』屈服,令前線睇清楚手上嘅談判籌碼其實唔多,加上有份罷工嘅前線陸續收到『警告信』,若然再收多一封,隨時被炒魷魚,呢個時世無咗份工?當然紛紛打退堂鼓。」
「陣線」發起人亦被發現背後不但有職工盟及其他工會撐腰,甚至受幕後大佬影響,其中最明顯係,主席余慧明揸住咪宣布停止罷工後,不斷眼望手機,似讀稿咁話會有運輸業工會發動罷工,又話會搞罷工基金,似係幫幕後大佬做勢兼籌錢,同醫護罷工初衷離題萬丈。
曾做過深切治療部護士,一八年轉到醫管局總部醫療信息部任一級行政主任嘅余慧明,月薪近七萬元,係非緊急後勤員工,負責處理醫療數據,協助決策。副主席羅卓堯為前學聯副主席,一四年佔領事件期間已十分活躍,一五年起在東區尤德夫人那打素醫院任外科病房護士。消息人士話,陣線內亦有權鬥,尤其係羅恃住有搞社運經驗,亦跟職工盟等大佬相熟,故喺陣線內成日話晒事,令余慧明好冇癮。

疫情嚴峻下,醫管局嘅醫療物資近日極速消耗,口罩存量更僅餘一個月。

 

「醫管局員工陣線」被發現背後有職工盟及其他工會撐腰。