為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 娛樂放題  > 娛樂追擊 2020 年 02 月 05 日

唔怕除口罩 最怕冇工開 張曦雯求桃花增運勢

增桃花運 紅粉緋緋嘅張曦雯擺明行緊運,但為咗增桃花運及觀眾緣,新正頭約埋老友一齊去求桃花,由陳定幫師傅指點迷津。

武漢肺炎蔓延不止,TVB劇集如常開工,演員為咗妝容,就算戲外,埋位前都唔可以戴口罩。日前新劇《踩過界II》就有四名主要演員王浩信、蔡思貝、張振朗及簡淑兒齊齊病倒「冧廠」,另一女主角張曦雯亦不適取消外景。監製林志華表示演員們連日開工,加上拍外景時遇大風而病倒。對於要冒險除口罩開工,新紥姐仔張曦雯(Kelly)就話唔驚,事關做女一的機會唔係時時有,「冒險都冇計,最重要係有工開,有嘢做。」趁住新正頭,挾住台慶中奪得「飛躍進步女藝員」獎的旺氣,日前她拉埋好友徐肇平及KOL好友朱韻韻去佛堂求桃花,望盡快乘勝追擊「升呢」做視后。

誠心許願 Kelly跟KOL好友朱韻韻誠心閉目許願。

親抱男童 冇戴口罩的Kelly抱住男童作近距離接觸,防護意識低咗啲喎。

當日一行三人去土瓜灣一間佛堂行桃花運,順道拜財神及太歲。三人冇戴口罩,喺佛堂內誠心上香,又合十順時針圍住桃花行咗三個圈,師傅陳定幫提示她要邊行,邊諗住心目中期待實現嘅畫面,之後將寫有心願嘅小天燈掛上桃花樹上,再閉目許願。Kelly喺佛堂逗留期間,有女善信帶埋兒子跟她集郵,Kelly親切地抱住小朋友影相時,俏面更貼近男童,雖然舉動好nice,但防疫意識未免薄弱咗啲,就連廣東省衛生健康委員會都有防疫指引,提醒與別人談話時盡量保持1米以上距離啦。

講到新年願望,張曦雯希望自己及家人身體健康,她屬馬,今年冲太歲,師傅叮囑她小心駕駛,最好玩吓碰碰車嚟化解意外,幸而Kelly行運中,愈冲愈旺,能逢凶化吉。她大笑說:「我桃花反而都ok夠,不過,始終做呢行要多啲觀眾緣,男友反而唔多理,我哋好少見到面,唔好問我點算好,我都係想專注喺工作上,慶幸大家感情都叫穩定嘅。(下個目標做視后?)會繼續努力,希望桃花可以幫到手。」對於傳過緋聞的陳國強辭任TVB董事局主席及非執行董事職務,她希望藉此畀大家睇到她實力及努力,見證她進步,絕對唔係因為人事:「我冇搵陳生呀,都唔知點搵佢,佢哋係大人,我只係小員工,公司行政接觸唔到,而且係大人嘅事。」

趕工拍攝 日前Kelly喺密室拍《踩過界II》。

真係病咗 日前她跟姜麗文、蔡思貝喺粉嶺山頭拍外景,又攰又凍,仲冇得戴口罩,之後蔡思貝及她即病了要取消拍攝。

繼《木棘証人》後,《踩過界II》係Kelly第2套擔正做女一嘅戲,有指視后李佳芯突然被消失,由Kelly取代,Kelly即說:「冇話邊個可以取替到邊個,不過,拍過嘅《跳躍生命線》、《白色強人》兩套都成為『最佳劇集』,而男主角馬德鐘、馬國明分別封視帝,我好旺男演員,另我有份演出嘅《金宵大廈》反應都好好。喺《踩II》我演一個好有心計嘅律師,為咗場官司接近盲俠王浩信,甚至會着貼身衫,用氣味及聲線去色誘佢,摸佢。以前做開靚靚女女角色,最初都擔心做唔做得嚟,但幫幫師傅話我今年旺做癲、喪、奸嘅角色,加上啱啱攞完奬,所以做得好有壓力。」

提到全城做足防疫措施自保下,唔戴口罩開工的Kelly就唔太顧忌:「要拍戲,戴唔到口罩都冇計,唔使埋位時唯有行開一邊,勤啲洗手,我諗最重要係有工開同有嘢做。」咁做藝人點都係要食住個勢嚟上位,睇晒呢個超級病毒都阻唔到她的決心!

心計律師 她在《踩過界II》中做有心計的律師,會色誘盲俠王浩信。

好有條件 Kelly樣靚身材正,有條件受力捧。

開心攞獎 剛剛跟張振朗奪得台慶「飛躍進步男、女藝員」獎。

首做女一 之前跟羅仲謙等合作拍《木棘証人》,係Kelly處女擔正做女一嘅劇集。