俗語有云︰「三歲定八十」，昔日就流行「抓周」，來幫BB預測未來職業，從抓刀劍紙筆，看看他們將來是習武抑或從文，一歲就能看前程。
利嘉兒（Lily）囡囡劉書雅與林芊妤（Coffee）囝囝翟德彥均年滿一歲，正值新正頭，兩個萌B就來一次現代抓周。在他們面前，分別放了聽筒、畫筆，以及一百元紙幣等十二樣物件，究竟BB最後會揀甚麼？是否真的可以抓出個未來？立即來個BB大抓捕！

利嘉兒為女兒書雅穿上粉紅色紗裙，儼如一位小公主。

利嘉兒 X 劉書雅聞歌起舞

利嘉兒與商人老公Bong結婚八年，一直積極造人，終於在一八年，誕下囡囡劉書雅，不經不覺，女兒已經一歲幾。訪問約在一間playgroup進行，初來到陌生的地方，書雅顯得有點緊張，嘉兒笑指女兒是觀察家︰「佢去到陌生環境會比較靜，表面好似好Cool，其實係淆底，不過佢唔輕易喊，鍾意靜靜觀察，反而佢好怕個個哄住佢，我哋唔理佢就得。」
果然，過了一會，她開始周圍探索，嘉兒也很好奇慢熱型的女兒，抓周時會拿些甚麼。

嘉兒話女兒對發聲物件特別有興趣，所以她第一樣就揀了搖鼓。

「我估佢有機會攞芹菜，因為佢好為食。」結果令媽媽大跌眼鏡，書雅沒碰過芹菜，她看到地上的物品，想了一想，先拿起搖鼓，然後是畫筆、放大鏡，小妮子似乎喜歡「咩都掂吓」，但每樣也玩得不持久。
「其實都符合佢嘅性格，佢好有好奇心，鍾意探索，但份人頗為謹慎。暫時我見到佢最鍾意聽音樂，佢會攞支點讀筆俾我，叫我點俾佢聽。一聽到有人唱歌，或新聞報道嘅音樂，佢就會起勁拍手、搖擺身體，好搞笑！如果佢鍾意畫畫，我都好開心，小朋友有藝術喜好係好事，可以訓練耐性！」望子成龍，是不少父母的期望，不過嘉兒就認為，順其自然發展才是最好。

一家三口加兩隻狗狗祝大家平安喜樂，新年順遂，嘉兒更說女兒最鍾意跟狗狗傾計，感情要好。