為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 娛樂放題  > 娛樂追擊 2020 年 01 月 31 日

「小豬比」突燒至39度 陳展鵬漏夜帶女睇急症

武漢肺炎疫情嚴峻,令唔少父母都非常擔心,陳展鵬囡囡「小豬比」陳諾瑤10個月以嚟冇病冇痛,喺大年初二晚突然發燒至39度,搞到展鵬夫婦不知所措,決定漏夜帶囡囡去高危嘅醫院求醫,好彩只係感冒,服藥後翌日就退燒,唔少朋友都大讚呢位新手爸爸反應快,夠機警!因應疫情,TVB新劇《逆天奇案》暫時停工,展鵬就利用額外假期發放父愛,自爆親子關係更有所提升!

對於「小豬比」第一次發燒兼且有點肚屙,陳展鵬都一額汗,他憶述說:「之前開工太忙,好多親友投訴成年都未見過『小豬比』,我哋見初二都唔算太凍,小豬比狀態又OK,所以帶咗佢去拜年,見吓親友兼逗利是,點知即中招,估唔到個女喺豬年都要病一病(2月4日立春才算屬鼠年) ,其實佢經已好犀利,出牙仔都冇發過燒,可能轉天氣。」新任爸爸表示病毒好犀利,小朋友一唔舒服即刻發燒,「其實我哋都唔想做怪獸家長,真係好矛盾,但疫情加流感咁犀利,最怕喺呢個敏感時間出入醫院,好彩醫生夠經驗。原來做怪獸家長都要識做,要因應天氣,唔少朋友都讚我夠機警,話如果再拖遲兩日先去求醫就會更麻煩。」

展鵬表示因為唔使開工,多咗時間享受親子樂。

 

對於「小豬比」第一次發燒兼且有點肚屙,陳展鵬講起都一額汗。

 

讚小豬比夠硬淨

展鵬又大讚愛女好掂:「佢性格好硬淨,唔舒服唔會喪喊扭計,反而係咁拍打自己個頭。o依家我哋盡量避開去人多擠逼嘅地方,唔係驚,係公民責任,既然Feel到情況惡劣,少啲出街相對少咗被感染機會,咁樣疫情就會容易處理,為人為己,出街就要做晒全套防護措施。」展鵬又指因為唔使開工,多咗時間享受親子樂。「之前只係喺聖誕節放咗半日假,同『小豬比』去完打針就過咗去添馬艦嘅遊樂場,喺摩天輪下同『小豬比』飛吓,觀摩吓爸爸小時候最恨玩嘅旋轉木馬。連續幾個月都要開工,搞到連小朋友都唔認得我,望住我感覺好陌生。最初因為唔舒服連我抱佢都喊,只係可以畀熟悉嘅媽咪同工人姐姐抱,現時餵完藥就攬住佢瞓,攝位發放多小小父愛。」

 

 

 

 

陳展鵬囡囡「小豬比」陳諾瑤10個月以嚟冇病冇痛,喺大年初二晚突然發燒至39度,搞到展鵬夫婦不知所措,決定漏夜帶囡囡去高危嘅醫院求醫,好彩只係感冒,服藥後翌日就退燒。

 

湊女心得開心Share

新手爸爸展鵬又開心share湊女心得:「個女好乖,唔會扯口罩,因為我會諗辦法o氹佢玩住嚟戴口罩,戴咗後再讚吓佢,影吓佢,等佢覺得戴口罩係件開心事,但要小心唔好整痛佢。其實小朋友對每樣未接觸過嘅嘢都好新奇,尤其當小朋友想扯走口罩會被彈親,以後就會驚咗唔敢再戴,所以要小心處理第一次。」講到餵小朋友食藥,展鵬強調「盡量唔好掂到條脷,食完用水沖口,最重要嘅貼士係分開嚟餵,每隔半小時餵一種藥,可能餵藥需時好長,但小朋友唔會咁抗拒。家長們亦留意,要控制自己,因為小朋友只係識睇反應,對住小朋友時面容同語氣都要歡容啲,唔好咁緊張,所有嘢互動多啲,好似做呢行咁要八面玲瓏,就算話佢都要笑住嚟話,哈!雖然我成日『瀨嘢』畀人話黑口黑面,但對住屋企人梗係唔同啲啦。」問到咁有育兒心得的展鵬會唔會盡快生多個?展鵬笑言,「我哋呢啲唔會目標為本,要長做長有,享受咗『小豬比』先,反而最大嘅新年願望要喺事業上重新再出發,因為過去年多,喺人生階段裡面做咗好多樣好重要嘅嘢,o依家所有嘢都settle好,要再努力衝刺喇。」