為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 陸叔開CHAT 2020 年 01 月 29 日

陳永陸

生活是很個人化的態度,人稱「陸叔」的著名財經股評家、兼投資策略顧問,用輕鬆心態,與跨界別嘉賓及以時事專題,去打開財經及以外的話匣子。

由三百點的鼠年講起

踏入新一年,要開始部署今年投資策略,我最近接受訪問,回顧之前鼠年股市情況,然後預測今年走勢。事實上,除咗我人生中第一個鼠年(一九六○年),當時只得幾歲,當然唔識睇市,過去四個鼠年都見到股市受重大政治及經濟因素影響,往往捉唔到路,講笑咁講真係鬼「鼠」,亦可以話反映老鼠嘅機靈和生命力。
七二鼠年我讀緊大學二、三年級,亦有留意當年中美建交、尼克遜訪華,股市升到你唔信,由年初三百幾點一路升到七三年三月一千七百點,然後發生股災。七二年可以話係最瘋狂嘅股市,嗰陣分別有四間交易所,仲係寫黑板年代,股民成日聚集喺各個交易所嘅玻璃窗前,好似喺「金魚缸」外望入去睇股價。因為太多人,走廊逼到水洩不通,違犯消防條例,要出動消防員射水趕走圍觀者。呢個鼠年市,我並未處身缸中。

再踏入鼠年,隨中美貿易戰第一階段經貿協議簽訂,我相信今年港股氣氛會比上年好。

 


八四鼠年,中英談判以至簽署聯合聲明,對香港股市影響廣泛,談判期間市況反覆,由年頭一千一百點到草簽以至正式簽署後轉好,最後年三十晚以一千四百點收市,按年升逾兩成九。我當時未開始買股票,但因為利率超高樓市低潮,我把握時機換樓,由北角繼園台七百呎單位,搬到火炭大單位。當時火炭仲未發展,一千九百呎單位只售九十萬。
九六鼠年香港回歸在即,股市受此影響加上中資注資概念推動,以及地產市道及整體經濟漸趨活躍,大量資金流入本港,最終恒指以一萬三千六百點收市,升幅近一成八。雖然其後九七年內地宣布不能賤賣資產,潑咗股市一下冷水,但仍無阻升勢延至九七上半年,之後就出現亞洲金融風暴,形勢逆轉。
巧合嘅係我喺呢個鼠年再一次換樓,由灣仔會景閣兩房單位,換到同一屋苑三房向海單位,到????家都仲住緊。當時呎價約一萬元(港幣,下同),九七年曾升至超過兩萬元,唔夠一年升咗一倍。諗返起之前錯過咗呢個放盤機會都有小小後悔,特別係○三年沙士時可以六千元買返!
到○八鼠年,雖然美國次按危機喺○七年已開始,但當年香港受「港股直通車」概念刺激,恒指漲至三萬點樓上,幾乎每日都千億成交,惟十一月中央煞停直通車,令股市回落。○八年美國次按爆煲觸發全球金融海嘯,美國第四大投資銀行雷曼兄弟九月宣布破產,歐美多間大型金融機構亦出現問題,全球股市出現拋售潮,恒指數日內大跌三千點,年廿八以一萬二千五百點收市,跌幅四成六。
再次踏入鼠年,喺美國大選、中美貿易戰及香港社會事件等不明確因素影響下,港股仍然係政治市,難以捉摸,不過隨住第一階段經貿協議簽訂,我相信今年港股氣氛會比上年好,恒指波幅介乎兩萬五至三萬一之間。黃金料將大致平穩,波幅在一成之間。而低息環境下樓市難有大跌,我都係睇一成波幅。雖然呢個鼠年我自己未必同以往一樣再換樓,但主觀願望希望見到樓市調整,更多人可以上樓,安居樂業。