這個素人都可以當女神的年代，神的質素愈見參差，不過周秀娜（Chrissie）跟陳靜（Dada），從來都在「神界金字塔」的頂層靚位，不受外間任何「曲線」影響。
要一次過集齊女神s，只有大時大節才有可能，她們於賀歲片《家有囍事2020》中合演姊妹花，令「兩神同場」終於解鎖。
周秀娜表示：「之前就算同Dada拍同一部戲，都冇對手戲，今次終於見證到佢嘅吸引力，真係好強勁！」
其身旁的Dada則稱：「娜姐點打（動作場面）都冇怨言，係我嘅學習對象！」
二人一唱一和的客套說話，充份表現出她們的社會生存之道。豬年過得豐盛，鼠年來臨之始，周秀娜跟陳靜不約而同地都對新一年有所期盼，女神s，並非只有軀殼見得人，腦力才是她們最有力的資產。

 

Chrissie的……十年

論社會的生存之道，去年已入行十年的周秀娜，感受最深。「入行十年係我去年嘅最大事件，而且變化仲好大添！因為合約嘅問題，我要成立自己嘅工作室，去接觸一啲好唔熟悉嘅範疇，好似點去開始一間公司、計劃未來嘅方向⋯⋯我一睇到啲文件就一頭煙，所以要不停去學習。
「去年開始，我係有好大壓力，除咗幕前嘅工作，仲有好多濕碎嘢要搞，有一排我係好忟憎，個人完全專注唔到，好彩身邊有好多朋友，佢哋都會幫我、俾意見我，o依家睇番，就會覺得唔係乜嘢大不了嘅事。」

家庭觀念非常重的她，現仍跟家人同住。

雖然去年曾傳出跟余德丞（中）的緋聞，但她表示對方只屬朋友。

十年下來，由模特兒成為老闆，但周秀娜自認初心不變。「我自己係keep住向前看，以前嘅事會回顧，但一次就算。好似今次拍《家有囍事》，我做Dada家姐，拍嘅時候我會諗起細個，有一年時間得我同細佬兩個人住，因為爸爸媽媽落咗嚟香港。
「屋企人係我工作嘅最大動力，o依家我仲係同佢哋住，爸爸每日都送我落樓開工，睇住我上車。」
祖籍潮州的她，家庭觀念極重，「尤其過年，一定要一家人聚埋一齊，加埋朋友一齊賭吓發吓新年財，哈哈！雖然o依家我要派利是，但我仲好懷念細個（扌豆）利是嗰種興奮心情o架！」