為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 時事速報 2020 年 01 月 21 日

睇中醫 治未病 羅蘭:「中醫唔係病先去睇!」

熒幕前的羅蘭演出盞鬼活潑,腦筋靈活,訪問當日來到位於太子的賽馬會中醫疾病預防與健康管理中心,同樣面色紅潤,顯得分外精神,不說不知原來她已八十五歲。「拍戲成日熬夜,返工又唔定時,其實都幾辛苦。」她笑說。

楊君軍博士(右)跟羅蘭因計劃而認識,如今他既是羅蘭的主診醫師,更是她的養生活字典,經常跟她分享中醫保健之道。

 

不止頭痛醫頭

如此有返工無收工的生涯,羅蘭過了足足八十年,結果換來的是一身的肩頸膊痛,「可能睇劇本睇得多,頭轉去右邊就會痛。」數年前,她的左腳膝蓋更因長期磨損,軟骨被磨蝕引起痛楚,需要做手術置換金屬人工膝蓋。「做完手術發現隻腳唔知點解扯住痛,心諗應該要去睇吓醫生。」羅蘭續說。
直至一九年一月,帶着周身病痛的羅蘭,與熒幕最佳拍檔胡楓獲邀參加中心推行的賽馬會「擁抱健康」中醫計劃—長者保健資助啟動禮,並出任嘉賓。「擁抱健康」計劃跟中心同樣獲賽馬會慈善信託基金捐助,並由香港浸會大學中醫學藥學院成立及營運,「我知道修哥一向有睇開浸大嘅中醫,嚟到啟動禮知道中心有個計劃,睇中醫有全數或半額資助,平好多,所以就入會。」她笑着憶述。

 

 

中心引入了全港首部中醫四診儀,可用視像和特製儀器,分析人體的體質、脈象起伏和體質毛病。

 


如此一來,羅蘭就成為計劃的首位入會長者,可以半價接受中心的診症及治療服務,並因此認識到她的主診醫師兼中心主管楊君軍博士,「我哋中心跟浸大以往開嘅中醫診所好唔同,除咗會醫病,仲會治未病,即係會着重長者保健調理,等佢哋少啲病痛。而且參加計劃嘅綜援長者,可以免費睇症及接受治療服務。」楊博士說。
經楊博士的幾輪針灸、推拿和拔罐療程後,羅蘭笑指痛症很快已一掃而空,但楊博士卻終日「日哦夜哦」,說的卻不是中醫醫理,而是叫她注意坐姿,「坐姿或睇嘢姿勢唔正確,我幫佢針灸幾多次都唔會有用。」楊博士說時,精伶的羅蘭已即時用手指着下巴說:「我知道,下巴要收後,腰要直,眼望前面。我平時一坐低就會醒起博士嘅說話。」
除了一般的診治,中心還引入了全港首部中醫四診儀,運用機器採集和分析面相、舌頭的影像,以及左、右手脈搏的數據,「簡單嚟講,呢部儀器可以客觀採集呢啲數據,幫醫師做望、聞、問、切嘅基本診症,話你知你屬於咩體質,同有咩毛病。」楊博士解釋。

體質調理有法

根據中醫的理論,人體主要有九種常見的體質,包括平和質、陽虛質、陰虛質、氣虛質、痰濕質、濕熱質、血瘀質、氣鬱質和特稟質,楊博士指不同的體質各有飲食、藥療的宜忌,而中醫治病則着重以人為本,按不同人的體質和症狀,調整處方對症下藥。「好似人人都話飲花旗參可以清熱,其實在中醫角度,花旗參只清虛熱,唔係個個啱飲。」楊博士說。
楊博士續指,臨牀經驗加上儀器收集的大數據顯示,香港人大多都有兩、三種體質毛病,而且大多屬於痰濕及濕熱體質,「同香港嘅氣候環境好有關係,而且香港人生活忙,壓力大,長期食無定時、夜瞓等,都係主因。此外,長者因年紀漸大,身體機能難免退化,亦常出現陰虛或陽虛的症狀。要預防病倒,就要做好調理。」他解釋。
經過半小時的診斷,楊博士大讚羅蘭日常調理有道,平日會戒辣和煎炸食物,飲食盡量少油鹽糖,所以面色紅潤,身體毛病不多,「不過平時都可以沖石斛茶飲,多食燕窩同雪耳滋陰,夜晚用薑浸腳,好好調養。」他說。
如今,羅蘭已成為中心的常客,即使沒病沒痛也會定期到中心覆診,「老人家如果病先嚟睇醫生就太遲,所以我成日同朋友講,無病更加要睇中醫調理吓,咁先可以保持健康。」她所說的,正正跟中心的成立目的不謀而合。

計劃去年初的啟動禮,邀得羅蘭跟幕前最佳拍檔胡楓出任嘉賓,二人亦成為計劃首批長者會員,羅蘭其後更成為中心的常客。

 

力推全方位公眾教育

中心自一八年啟用,至今已有逾千位長者跟羅蘭一樣,接受計劃的長者保健資助服務,但楊博士指香港人普遍仍有「沒病就不應睇醫生」的觀念,因此中心除了診症,近年亦積極向公眾宣揚「治未病」的觀念。
「我哋會定期搞養生同體質分析講座,亦會拍攝短片、出版書籍宣傳四季養生同防治常見慢性病嘅簡單療法,同時亦有網站同手機程式,希望可以讓公眾明白,預防往往勝於治療。」楊博士說。
香港賽馬會慈善事務高級經理鍾惠敏表示:「馬會多年來致力推動本港醫療衞生服務,並深信預防勝於治療,透過支持多項計劃提升疾病預防及健康管理的大眾認知。」

中心會不定期舉辦講座和分享會,宣揚中醫治未病的概念,並向公眾推廣中醫養生保健的方法。