為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 娛樂放題  > 娛樂追擊 2020 年 01 月 17 日

是非纏身愁爆開工 楊明搵馬蹄露吐苦水

是非纏身的楊明日前愁爆開工,其間仲搵馬蹄露吐苦水。

鑒於社會局勢動盪,警民關係緊張,以警察為題材的無綫新劇《伙記辦大事》都要低調拍攝,日前,主演的歐陽震華(Bobby)、楊明及馬蹄露等於大埔為劇集拍外景。現場所見,近日是非纏身的楊明滿面愁容,在等埋位期間,不但頻頻低頭篤手機及扯煙,更向工作人員吐苦水,幸有同路人馬蹄露開解,他才漸露笑容。

楊明(左)同馬蹄露好好傾,後者張一人座「家庭單車」好搶眼!

等埋位時,近日被網民狙擊的楊明不停扯煙、撳電話,睇嚟好愁吓!

楊明與莊思明拍拖3年多,已達談婚論嫁階段,近日思明因「借筆風波」惹來網民圍插,事後,胞姊莊思敏坦承妹妹一時衝動並代為道歉,原以為事件告一段落,豈料有航空公司趁機抽水,楊明即於微博出Po反擊,結果再被網民洗版式狂轟!翌日,遭是非纏身的他頹爆現身大埔,與歐陽震華、馬蹄露、賴慰玲等,為無綫劇《伙記辦大事》拍攝反車場面, 劇情講述飾演交通警的Bobby率領一班伙記駛至意外現場進行調查。

後來跟歐陽震華、馬蹄露和何啟南等圍住吹水,楊明先識笑番。

見到歐陽震華咁Chok,馬蹄露都忍唔住姣嗌:「好型呀!」

當日,未使埋位的楊明獨自呆坐路旁,其間不時低頭篤手機又啜煙,狀甚煩惱,有工作人員見狀即上前撩吹水,看他頻頻皺眉,估計都係吐緊苦水。未幾同劇一批演員嚟到,早前於街頭遇襲受傷的馬蹄露,甫到埗見到Bobby英姿澟澟,即風騷地吊高八度聲線大嗌:「好型呀Bobby!」之後又走到楊明面前傾偈,同路人特別投契,她更索性搬埋張「荷李活級」櫈仔去楊明隔離密密斟,馬蹄露張櫈都好架勢,有晒篷咁,驟眼睇仲以為佢踩緊「家庭單車」!

另邊廂,正拍攝中的Bobby則盡顯大哥風範,不但幫手指揮工作人員倒車,更帶領後輩演員埋位、走位,其後仲幫馬蹄露整理衣領,毫無架子。等Roll機時,Bobby又以誇張動作逗工作人員笑,未知是否見楊明悶悶不樂,後來更主動同對方傾偈,終於令楊明開懷大笑!

歐陽震華仲幫馬蹄露整理衣領,完全零架子。

莊思明近日鬧出「借筆風波」被網民圍插,男友楊明即出言力撐!