為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 陸叔開CHAT 2020 年 01 月 16 日

陳永陸

生活是很個人化的態度,人稱「陸叔」的著名財經股評家、兼投資策略顧問,用輕鬆心態,與跨界別嘉賓及以時事專題,去打開財經及以外的話匣子。

管理應收帳的學問

我好鍾意訪問不同行業管理者,因為「問」完真係「學」到嘢。好似睇戲見到催收債務劇情,多數係態度惡劣,甚至到欠債人屋企大大隻字寫上「欠債還錢」以追收欠款。到底係戲如人生,定係實屬虛構?我最近就訪問過一間應收帳管理公司標保(BIBO)創辦人黃鏡興(Ken),佢第一句就話呢個「情節」真係令到好多人對行業有誤解。Ken解釋,行業已經隨着時代轉變不斷進步,收帳根本唔可以亦唔會「靠嚇」,反而更注重合規性、同理心,並注重保障個人私隱,以及運用科技和大數據分析,非常科學化。
標保喺二○○○年由Ken及另外兩位朋友創立,專門為客戶提供應收帳管理及專業催收提示服務。Ken在中大經濟系畢業後,順理成章入銀行工作,一做十多年,對金融業有深入認識,知道銀行和財務公司一定有應收帳,但內部未必有專門人手處理,所以會將呢個職能外判,以善用資源及提升收帳效率。而銀行非常着重合規性,所以標保嘅理念係為行業建立新的營運典範,以合規方式催收款項。標保由服務銀行客戶起家,但進入行業後,發覺所有先完成交易再收錢嘅公司都會有應收帳,所以進一步擴展客戶網絡至其他行業。我講笑問如我私人需要追債公司接唔接?Ken亦妙答話除咗麻雀數,其他都可以研究下。

標保集團創辦人黃鏡興(左)同陸叔講「數」。

 


講到合規嘅重要性,Ken認為應收帳服務冇實質產品,客戶冇得試,好難判斷服務質素,但公司進行催收時係以客戶名義接觸欠債人,一舉一動都會影響到客戶聲譽,所以服務質素唔係選項而係必須。標保建立咗一套規範系統加上嚴謹監察,因此過去廿年,處理超過一百七十萬宗個案,涉及對象近五十萬,建立起良好信譽。標保強調合規性,除遵循最基本嘅法規,亦會嚴格跟從行規、客規及「家規」,即公司內部訂立嘅工作守則,一共四大規則。
標保作為客戶及欠債人嘅中間人,要了解個案,平衡雙方觀點和利益,實事求是咁提出建議,幫助雙方達成協議以解決問題。所以公司好多員工係合資格調解員,亦會資助員工報讀和考取資格,以提高公司專業水平。
傳統應收帳行業工作較為勞力密集,標保就利用人工智能(AI)分析個案,計算催收款項嘅成功率,以安排工作嘅先後次序,並根據員工能力及特性配對工作,大大提升工作效率。同時,公司通過自動撥號智能系統,隱藏欠債人重要私人資料,以保障個人私隱,但同時會顯示先前與欠債人嘅對話,負責同事可以了解背景及最新情況,方便進行交接。
我見到Ken管理應收帳頭頭是道,當然問佢會否踏足應收帳收購業務,原來公司已成立有關公司。收購應收帳除為盈利,亦係幫客戶解決問題嘅方法之一,因為應收帳有時需要較長時間close file,客戶如果唔想浪費資源跟進,和盡量回收剩餘價值,出售債項都係雙贏方案。