為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2020 年 01 月 15 日

「驗屍式」審問 監警報告一月難完成

備受注目嘅監警會反修例報告,原定預計喺一月中完成交畀特首,惜審閱過程一波幾折,出現唔少阻滯。消息人士透露,審閱過程為高度保密,不能將報告透過電郵畀委員,必須邀請佢哋一齊上監警會睇,睇完又唔准拎走。偏偏二十幾個委員都係大忙人,要約齊人好困難;加上部分委員有律師、大律師背景,審閱字眼時十足驗屍咁驗,改完又要翻譯成中文。知情人士話:「睇怕個報告一月未必面到世!」
長達三百幾頁嘅第一階段性報告已寫好,日前有傳監警會仍未搵到合適翻譯,但消息人士話,翻譯工作其實做緊,最大難題係點畀委員審閱,「話晒份報告有成幾百頁紙,唔係一時三刻可以睇完。本來電郵畀大家返屋企慢慢睇係最方便,但監警會要遵守保守秘密守則,為免百密一疏,相約委員上去監警會即場睇係最穩陣。」

監警會份中期報告已進入大直路,主席同班委員正金睛火眼審閱字眼。

 


之不過班委員各有各忙,單係夾時間都有排傾,最後決定以小組方式約埋上去監警會睇,一次睇唔晒就再約過。除咗夾時間係問題,審閱字眼就更加花工夫。
據知班委員對報告嘅政治立場無太大爭議,反而對用字相當小心,知情人士續說:「月前有社運人士申請司法覆核,指監警會主動審視六月九日至七月二日嘅大型示威遊行係超越職權範圍。既然明知可能面對司法挑戰,班委員審視報告時就更加小心,尤其對指出警方有何問題嗰部分,用字極為謹慎,十足驗屍咁驗,唔想留有空間畀人抽後腿,故此部分字眼改完又改。」
咬文嚼字其實無可厚非,不過每次當委員有嘢改,就要通知翻譯作出修正,「如是者譯完又改,改完又要再譯,來回咗好多轉。」
自從五名國際專家小組成員集體「跳船」,外界對監警會份報告大潑冷水,認為對釋除公眾疑慮不予厚望。正因為咁,班委員更加唔想畀人踩多兩腳,呢次嘅審閱工夫係異常緊張。睇嚟因為咁令報告延後出爐,都係情有可原。完晒艱巨嘅審閱工作之後,份報告仲要提交大會通過。到底報告正式公布時會否掀起社會爭議,就要睇班委員嘅功力。

逾三百頁嘅報告將審視警方防暴工作是否有不足。

 

五名國際專家小組成員早前集體「跳船」,令監警會嘅公信力增添唔少壓力。