為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2020 年 01 月 08 日

中間派擬推「公聽會」 倡行會成員領軍化解警暴指控

監警會早前爆出國際專家組跳船風波,令第一份報告未出街已不被外界睇好。針對警暴的謠言滿天飛,近日有中間派人士倡議政府喺監警會旗下設「公聽會小組」,就捲入警暴疑慮事件搞幾場「公聽會」,邀請投訴人、警方及關注事件嘅市民即場對話,然後以直播方式播出。消息人士話,有示威者聲稱遭扒光衣服然後被性侵嘅新屋嶺疑雲,最適合做首場試點。
「公聽會」旨在畀機會市民同警方有個對話平台,並無傳召權。推動「公聽會」嘅中間派人士話:「若然搞得成,出席者係自願性質,被投訴嘅差人唔一定要現身對質,但警方高層可以派代表出席,就投訴人嘅指控即場回應,咁做有助減低外界指警方四點鐘嘅記者會經常自話自說嘅感覺;而投訴人亦可以要求喺屏風後面或者蒙面作供,避免樣貌曝光,不過所講嘅嘢就要自己負責,若然涉及誹謗,要自行承擔。」

若「公聽會」成事,將可邀請警方高層代表出席,就警暴指控即場跟投訴人對話。

 


呢個構思可以話係史無前例,即時喺政圈引起一番討論,盤算可行性有幾大,以及利弊所在。中間派人士欲成其事,不過最後成事與否,好睇特首林鄭敢唔敢面對警暴指控呢個燙手山芋,亦要視乎警方高層肯唔肯派員出席。
為免「公聽會」變成一場批鬥大會,主持人嘅功力相當重要。咁到底有誰人主持個會最合適?消息人士話,傾向搵一至兩位行會成員做召集人,聯同幾位現任或前任監警會成員組成小組,「即場對答嘅好處,係等市民睇到小組成員問過乜?避免外界覺得監警會只係一味匿埋調查,最後查過乜,外界亦無從得知!」
監警會嘅中期報告將喺一月中出爐,若然出來嘅效果「無料到」,睇怕政府面對成立獨立調查委員會嘅壓力必定大增。有前監警會成員直言,長遠解決方法係透過立法或修改法例方式,更新監警會職能至得。

中間派倡議由行會成員牽頭成立「公聽會小組」。

 

新屋嶺性侵風波惹起疑雲陣陣。