為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 娛樂放題  > 留星語 2020 年 01 月 13 日

幸運是我 陳家樂

陳家樂上鏡好靚仔,真人仲靚仔。然而,他真正上位爆紅,都是從前年劇集《逆緣》中的「冷凍爺爺」才開始,即是他入行十二年後,可見娛樂圈這一行,靚仔並非大晒,要升呢,一切還看個人際遇,天時地利人和。
「始終都係人生嘅經歷,冇得去計算紅得遲定早。老實講,如果『冷凍爺爺』呢個角色,早十年前俾我做,我都未必做得到,或者做得好,我都唔會捉到呢個機會,盞嘥咗、浪費咗。」
默默耕耘足十二年,忽然入晒屋、大受歡迎,家樂坦言,那刻除了好開心,亦好驚。「我好驚大家會唔會只係一時之間對我有興趣,先俾呢個機會我呢?同埋嗰吓都會有壓力嘅:當你呢個角色多人鍾意嘅時候,你自然會希望下一個角色會做得更好,嗰種壓力,就係點樣可以突破到自己,好想進步。」
多得排得密麻麻的工作,讓他冇得諗太多。「嗰吓突然間每日有好多唔同嘅工作要處理,啲時間好緊迫,就算有呢啲念頭,好快都要擺番低。慢慢、慢慢,我每日只會做好自己嘅工作,做好自己。」
是故,他對於自己擁有這些際遇,都是感恩、感恩和感恩。
懂得感恩的人,都會比較幸運;而更幸運的,是他現年才三十三歲,仲有大把世界。

 

 

爸爸的夢

陳家樂○三年曾參加過新秀,入過十六強,直至○六年簽約英皇,才正式入行。他是家中大仔,有一個妹妹,入娛樂圈,多少都是因為家人大力支持,尤其是父親。
「我有問過爸爸點解咁支持我,原來佢自己本身都好想做呢一行,哈哈哈!佢細個成日都參加歌唱比賽,又做過特約,拍過TVB啲劇,做過發哥(周潤發)後面嗰啲(角色)。佢o依家都成日參加社區會堂啲歌唱比賽,去上堂學唱歌o架!佢會覺得,既然我有咁嘅機會,又有唔同嘅人俾機會我,我就要好好去堅持、珍惜,唔好諗其他嘢。佢俾咗好多信心我,我o依家好似幫佢圓緊呢個夢咁。」
大概正因為家中有個這樣的父親,故家樂小時候,已當過童星。「都可能係因為我爸爸佢哋,好想我去做o架。其實都唔係乜嘢童星,只係拍過幾個小朋友廣告,上過《閃電傳真機》嗰類節目。以前好興有星探喺街發掘人o架嘛,佢哋覺得我得意,就搵咗我去casting做主角,點知我埋到位,好驚,乜都唔講;要我跳舞,我又唔跳,跟住就做咗隔籬嗰啲(角色)咁囉,哈哈哈。」

一六年與影后惠英紅合演《幸運是我》,讓他得到更多導演和監製注目。「有個導演睇完,就搵咗我拍《兄弟班》呢套戲。」

 

○八年,陳家樂參演首齣電影《保持通話》。那時才廿二歲的他,仍一臉稚氣。「對我嚟講,拍咗呢套戲先叫做正式踏入影圈。」