為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2019 年 12 月 28 日

三招拆解積壓問題 范鴻齡強勢管醫生

有「公職王」之稱嘅范鴻齡呢個月上任醫管局主席一職,隨即遇上有醫管局新工會號召罷工。新官上任嘅范唔單止無左閃右避,更表明罷工「絕對不可以接受」。日前佢首次主持醫管局會議,更斬釘截鐵使出三招,包括成立專組挽留醫護人員,加快成立智慧醫院,以及縮短專科門診輪候時間,應對積壓多時嘅問題。
消息人士透露,強勢坐鎮醫管局嘅范鴻齡銳意帶來新管治風格,作風唔再一味打柔性牌,「外界錯覺以為佢非醫生出身,係外行人管內行人,其實佢心水不知幾清,未上任已勤做功課,事事打爛沙盤問到篤。」
醫管局近幾個月墮入政治漩渦,雖然行政總裁高拔陞月前發過內部電郵,呼籲醫護唔好喺醫院範圍集會,不過前線唔多賣帳,繼續擺出人鏈陣,又喺院內大搞連儂牆,令高層非常頭痛,四出同前線摸底,睇吓佢哋有乜不滿。

醫管局將成立專組研究挽留醫護人才,新措施將成熟一項推一項。

 

范鴻齡上任主席後首次主持會議,明確提出三招對治醫管局當前難題,展現新領導風範。

 


有熟識局內情況人士透露:「認為做得醫生嘅都係精英,高層一直要管醫生一定要保留自主空間,唔應該乜都高壓,過去幾個月前線醫護首次喺公院內整連儂牆抗議,高層都唔想跟同事硬碰,不想局勢升溫。不過自從范上場後,管治風格明顯加辣,對大是大非嘅政治議題立場非常清晰,絕不模棱兩可。」
話口未完,社交媒體日前突然傳出,局方高層下令要清拆連儂牆,據知部分醫院嘅抗爭文宣已被清走,換上聖誕裝飾;有前線醫生感到被滅聲,馬上發文炮轟。本刊向醫管局查詢,發言人回覆話,對未經批准張貼嘅告示或海報,會按既定程序處理。
對於高層擺出強硬姿態,唔畀政治帶入醫管局,有醫生鬧爆高層專制,不過亦有一批資深醫生大表認同。在公立醫院任職專科醫生多年的陳潔霜認為,醫生搞罷工會令專業形象盡失,卻無助爭取政治訴求,「政府呢家唔係話唔出糧畀醫生噃,既然我哋出緊糧,作為醫生,應該以病人利益行先,試問有乜理由罷工?政治問題應該用政治解決,不應連累到病人受苦。」
對於范鴻齡提出銳意挽留人才,陳潔霜認為人手流失問題並非一刀切可以解決,「局方應該深入各部門、各小組,仔細了解留唔到人嘅真正原因。就算劃一加三幾萬蚊畀醫生係無意思,有些醫生走係因為工時長,有些係不滿編更制度,醫管局想對治問題,一定要對症下藥。」

陳潔霜醫生(左一)憂慮罷工行動會損害醫生專業形象,促請政治問題以政治解決,不應連累病人。