為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 陸叔開CHAT 2019 年 12 月 20 日

陳永陸

生活是很個人化的態度,人稱「陸叔」的著名財經股評家、兼投資策略顧問,用輕鬆心態,與跨界別嘉賓及以時事專題,去打開財經及以外的話匣子。

5G米路

全球流動通訊行業明年踏入5G年代,相對上一代4G更快、更穩,仲可以做到近乎零延遲嘅資訊傳遞。5G手機市場係兵家必爭之地,小米集團(1810)最近推出第二部5G手機,售價低廉且規格具競爭力,係全球首部售價低於兩千元(人民幣,下同)嘅5G手機。有券商估計其他品牌要到明年三月至會推出類近價格嘅手機,顯示公司可憑藉價格優勢搶佔市場分額。另外,公司計劃於明年推出最少十款5G手機,滿足不同用戶嘅需求,全面捕捉5G換機潮。
小米「MI」代表「行動裝置互聯網」(Mobile Internet),個名已經表達核心業務係互聯網科技,並以手機、智能硬件及物聯網平台(IoT)作為業務支柱。而從公司嘅創業故事,我見到個MI商標原來有另一層意義,因為將商標反轉就係少咗一點嘅「心」字,代表公司希望令每個人可輕易(省點心)享受科技嘅樂趣。依循呢個理念,公司用互聯網模式開發產品,開發時去除中間環節,以降低成本令價錢大眾化。同時亦利用物聯網平台,開發「米家APP」,連接唔同智能設備,用家通過手機程式,就可以控制已連接嘅智能設備,「省點心」就係咁意思。

當明年5G塵埃落定,小米可受惠於換機潮,繼續帶動業績。

 


小米二○一○年創立,以智能手機系統作為起點,原因係當時注意到主流系統有好多功能冇辦法喺中國直接使用,所以自行開發適合市場嘅應用系統,一一年推出第一款手機,首次開售三小時內將十萬部庫存賣完,一度供不應求。之後公司繼續完善生態圈,擴大物聯網平台服務圈,發展其他智能產品,如小米手環、冷氣機、空氣淨化器等等。另外公司同接近一百間智能硬件公司合作,利用米家APP連接各種裝置。今年八月更與宜家達成合作,將App接入佢嘅照明產品。截至九月,米家APP已連接兩億多部設備(唔包括智能手機及筆記本電腦),每月活躍用戶數達到三千二百一十萬,已發展成全球最大消費級物聯網平台。
小米一直放眼世界,第三季度境外銷售繼續迅速增長,收入增長一成七至二百六十一億元,佔總收入近四成九。目前智能手機出貨量喺四十幾個國家和地區位列前五。根據不同調研機構數據,小米智能手機在印度連續九個季度保持出貨量第一,在西歐第三季度排名第四,其中西班牙出貨量在公開渠道排第一並在整體市場排第二。
小米第三季度智能手機分部收入略跌至三百二十三億元,銷量逾三千二百萬部,主要係內地正處於4G與5G交接時間,唔少消費者暫時觀望,但可留意內地智能手機平均售價按年升百分之四點六,毛利率亦按季有所提升。公司首九個月收入一千四百九十四億元,升近一成五,純利七十六億元,跌兩成五,而經調整淨利潤(非國際財務報告準則)升三成七至近九十二億元。我睇過公司首三季業績後,已作出推介,到截稿前股價升咗百分之十八,由剛推出5G手機熱烈反應睇嚟,相信明年5G塵埃落定,小米可受惠於換機潮,繼續帶動業績。