為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2019 年 12 月 18 日

許仕仁獄中生活揭秘 最低工資做清潔工

人稱「肥龍」嘅前政務司司長許仕仁,一四年被裁定「公職人員行為失當」等五項罪成,判監七年半,眨吓眼佢已經坐咗五年有多,仲因為獄中行為良好兼扣減假期後,今個星期三就可以放監重獲自由。
本刊明查暗訪佢呢五年嘅獄中生活,原來佢每日要工作最少六個鐘,工種則由製衣、針織、皮革產品到書籍裝訂和信封製造都有,工資有高有低,不過肥龍年紀大又有長期病患,能力所限只能做最低工資嘅醫院清潔工或貼信封。
「佢大部分時間都住喺監獄醫院,所以主要做清潔工,有時身體好啲返去獨立倉,就做貼信封,兩工種都唔需要特別技術,屬獄中嘅最低工資類別,周薪只有八十多元。」知情人士透露。
此外,坐咗五年監,最初兩年都有不少朋友前往探望肥龍,不過兩年後就全部消失,只剩番佢老婆去探監,同埋帶啲書畀佢睇,等佢可以消磨吓時間。
肥龍以前食好住好,生活奢華,最初坐監完全唔適應,冬天瞓覺要冚九張被,幾張用嚟鋪牀幾張冚身先夠暖。佢亦因為有病,不時要入住監獄醫院,加上飲食清淡人都瘦埋,到後來慢慢習慣,先肥番少少。

前政務司司長許仕仁坐監五年,獄中主要做清潔工。

 

出獄靠老婆養

破咗產兼已屆七十一歲嘅肥龍,估計出獄後都係靠老婆養,佢太座羅美美係退休高級公務員,仍食緊長糧,兩口子慳啲使,應該夠生活嘅。
肥龍一二年涉貪受查翌年,就因欠銀行超過五千萬元而被申請破產。佢破產前將一千五百幾萬元轉到太太名下公司,又將五十三萬元轉畀與他一同被判監嘅好友關雄生。不過此舉點會避得過破產受託人嘅法眼。破產受託人先後喺一五年及一六年,入稟高院追討呢兩筆錢兼利息,並三度拍賣肥龍嘅珍藏,包括一批頂級紅酒干邑、逾萬張黑膠唱片及雷射影碟、近八十件字畫、象牙工藝品、HERMÈS手巾等,連紀念座都被拎出來賣。

近年只有許仕仁太太對他不離不棄,前往探監。

 

許仕仁被判破產後,他家中私人珍藏都一一被拍賣還債。