為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2019 年 12 月 12 日

高危下搞工展會 廠商會預蝕三百萬

一年一度嘅工展會喺本周二(十二月十日)開鑼,撞啱社會持續六個月都有抗爭堵路,高危到保險公司都唔受。風險咁高,一度令會內高層想停辦。之不過消息傳到去特首林鄭月娥度,佢擔心唔搞會令社會氣氛更差,馬上游說商會照去馬,仲賣大包首次減收場租。
平還平,知名品牌如「威馬電器」、「李錦記」等擔心隨時被「裝修」傷及員工,唔參加嘞。埋單計,聽聞出租率只得約八成。廠商會為防有人搗亂,明知收入少咗都要大幅加聘保安。消息人士話:「今年預咗無錢賺,仲要倒蝕三百萬元!」
因為政府減平租場費,商會早前亦將攤位減租三成作招徠,可惜大會因為買唔到保險,月前突然要求參展商重新簽約,講明風險要自行承擔,令部分展商卻步。大會亦將開幕式低調處理,取消一貫嘅升旗儀式,唔請特首或者官員等城中VIP剪綵。
無開幕式,今年工展會仲剩番乜?據商會中人話,部分參展商擺好個陣做「劈價場」,「過去半年四圍示威堵路,班商家入晒貨但完全開唔到舖,積壓大量存貨,今次索性趁工展會劈價益街坊,散貨套現好過嘞。」

工展小姐選舉一向係工展會重頭戲,今年照樣如期舉行。

 

內地客近日大幅減少來港消費,去年人頭湧湧嘅工展會未知能否延續氣勢?