為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2019 年 12 月 11 日

改組行會角力戰 被「叮」名單上榜 湯家驊:我無做錯!

持續半年嘅反修例抗爭無止息,民陣上周日(十二月八日)發起遊行,港島區人海再現,但黑衣人無再堵路、大規模縱火,火藥味明顯無之前咁濃。趁社會稍為回復理性,要求特首林鄭月娥「找數」,兌現月前講過「解決這場風波之後,不排除改組問責團隊及行政會議」嘅承諾。當中要求重組行會之聲更是此起彼落,盛傳林太一度研究過換人名單,有人矛頭指向喺修例風波上撐得好前嘅湯家驊同葉劉淑儀。湯家驊對外界認為應該「叮」走佢感無奈:「咁樣對我好唔公平,我覺得自己無做任何錯嘢!」
外界要求政府正面回應在修例風波中因錯判形勢而造成的亂局,早前曾傳出有問責官員請辭,但由於司局長級官離任要得中央首肯,陣前易將難度高。相反撤換行會成員,林鄭自己都話到事。
消息人士話,林太亦有感「有啲人真係無作為」,擬研究透過重組行會,予外界洗心革面嘅決心。據聞月前佢已四出會見政商界領袖,聽取對換人有乜睇法。呢次林太唔係齋吹水,而係仔細徵詢有乜替補人選可以考慮。席上有人提議換入全國政協常委唐英年,亦有人建議一份替補名單,當中包括多名政商界精英,取代部分現有人選。到底邊位被「叮」呼聲高?有人矛頭指向一直喺修例風波上瞓身力撐嘅湯家驊同葉劉淑儀,認為佢哋責無旁貸。
無端畀人擺上枱,湯家驊大感無奈。佢回覆本刊查詢話,對是否需要撤換問責班子或行會成員來緩和局勢,不便評論。但聽見外界有聲音認為要踢走佢,就高呼好唔公平:「整件修例唔係因我而起,我負責嘅工作只係解釋修例,以及法律上嘅觀點。因此你覺得我做得唔好或者唔稱職,應該由番林太去決定,我覺得自己無做任何錯嘅嘢!」葉太則回覆表示:「不予置評!」
有行會成員私下抱不平話:「今次抗爭者嘅矛頭明明係指向特首錯判形勢,硬推修例!試問有幾多個示威者講得出行會成員入面有乜人?????家就算換走幾個行會成員,抗爭者都唔會收貨,要問責,都係林鄭或相關官員,幾時輪到行會成員?」

要求行會重組之聲近日此起彼落,政府改組是有助解困,還是幫倒忙?

 

湯家驊對外界認為應該踢走佢感到不公:「整件修例唔係因我而起,我負責嘅工作只係解釋修例。」

 

林鄭曾聲言解決這場風波之後,不排除改組問責團隊及行政會議,但至今未見「找數」。