為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 陸叔開CHAT 2019 年 12 月 13 日

陳永陸

生活是很個人化的態度,人稱「陸叔」的著名財經股評家、兼投資策略顧問,用輕鬆心態,與跨界別嘉賓及以時事專題,去打開財經及以外的話匣子。

仰光的義烏概念

上星期講到星邁黎亞集團(Samanea)幫內地企業沿一帶一路走出國門,其中最重要係公司對進駐城市嘅消費趨勢、銷售渠道、貨品物流、法制等都有深入了解,可建立真正落地嘅不同營運模式。我好同意,一套模式走天下,最終可能無功而回,好似我跟星邁黎亞麥原(Michael)到訪星、馬、緬,其中吉隆坡以大型家居中心,包括線上線下模式營運,非常適合當地市場,亦能幫助內地小型新晉家具設計品牌喺當地小試牛刀。至於行程另一站緬甸仰光,營運模式就截然不同。
緬甸二○一○年結束軍政府統治,一一年推動改革開放,作為東南亞一個新開放市場,唔少外資都把握先機進入市場分一杯羹。緬甸政府為外資建立一個友善嘅經商環境,一八年發表嘅新《公司法》更容許外資獨資進行各類商品零售及批發。世界銀行給予緬甸嘅創業容易指數評分,亦在七年間提升六十八分,至一九年七十七點三分。

星邁黎亞麥原(右)解釋公司 在各地的部署。

 


仰光係緬甸經濟及交通中心,競爭力較強,一六至一七年城市GDP升幅百分之八點五,佔國家總GDP約兩成三;最新預測一九/二○財政年度仰光GDP可升百分之八點九。城市勞動人口比例亦高,可支持經濟增長,而且收入增速快,消費持續升級,加上儲蓄意願低,市場有一定消費力。有報告預計二○三○年緬甸中等收入消費群將達到一千九百萬人,銷售市場可達一千億美元。不過目前仰光嘅中產階級尚未形成,傢俬呢類較高消費貨品仍未有足夠需求,因此星邁黎亞對呢個市場作出另一種部署。
公司睇準仰光日後嘅發展潛力和目前現況,喺當地重點新區自建商城物業,第一期佔地面積三十萬平方米。其中建築面積超過十萬平方米嘅商城即將開業,比起現時當地四個專業商場規模更大。公司覺得仰光嘅發展軌道同昔日義烏有啲相似,於是計劃將義烏小商品城嘅經營概念複製到仰光,並由擁有逾十年經驗嘅團隊營運,提供一系列增值服務以提升商城及進駐品牌競爭力。
三、四十年前嘅義烏只係浙江省一個交通不便、資源有限嘅小城鎮,到今日發展成有機場、鐵路嘅國際化商貿城市,靠嘅係「細眉細眼」嘅小商品。義烏今日係全球最大嘅小商品經貿地,共有一百八十幾萬種商品喺當地集散,可以話全世界都搵到義烏嘅商品。呢個本來名不經傳嘅地方已經人盡皆識。
仰光有當年義烏嘅影子,甚至起步條件更好啲。緬甸被聯合國評為最不發達國家,因此享有各種優待,亦可享東盟自貿政策及貿易普惠制待遇,五千幾種產品免稅進入歐美市場。而目前仰光已有成熟穩定、運費合理嘅陸運進出口物流,亦係唯一可以繞過馬六甲海關,快速通往印度洋嘅陸上通道。而且當地勞工薪酬低廉,轉口貿易能以較低成本經營,人民幣可在緬甸作為國際支付及轉帳結算貨幣,亦帶來便利。我期待日後再參觀星邁黎亞喺仰光建立嘅義烏模式小商品城。