為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2019 年 12 月 04 日

曾鈺成牽頭組對話平台 中間派「集氣」

淡出立法會後,作風轉低調嘅立法會前主席曾鈺成,上月十八號聯同多名政見唔同嘅社會賢達衝入理大連夜斡旋,成功勸服數百名留守者和平撤離。點計都算平亂有功,點知有藍絲陣營轟佢「為暴徒開脫」,勇武陣營亦唔領情,罵佢「吃人血饅頭」、「為選舉盤算」,阿曾知道後,一時感觸喊了出來。不過見慣風浪嘅曾鈺成好快回歸理性,近日佢成功籌組一個對話平台,希望可以緩和如今劍拔弩張嘅局勢。話晒阿曾唔係「盲撐派」,中間派一呼百應,「集氣」速度仲快手過特首林鄭。
據知個平台仍未度好名,但已經湊到近二十人,成員嘅政治光譜非常闊,包括港大法律學院首席講師張達明、新思維創黨主席狄志遠、前監警會委員鄭承隆、前財政司司長政治助理羅永聰、前立法會議員陳婉嫻、新民黨前政策總裁袁彌昌,及教育大學校長特別顧問戴希立等,組合夠晒新鮮。

曾鈺成(左二)與張達明(左一)早前入理大勸服逾百名抗爭者和平撤離,事後卻被罵為「吃人血饅頭」。

 

曾俊華前政助羅永聰被羅致加入對話平台。

 


消息人士話,呢個平台係無心插柳而成,成員不問政治酬庸,通通係因為早前有心想協助營救理大班學生而聚埋一齊。雖然理大風波已暫告一段落,但彼此覺得就此「分手」好可惜,提議組個平台做「和事佬」,擔當抗爭者同政府之間嘅溝通橋樑,透過對話縮窄分歧,「政府一味話想搞對話平台,但搵官員落區同抗爭者傾已經行唔通,反而搵中間派人士居中調停,會更有商量餘地。」
抗爭之聲未有因為區議會選舉後平息,平台成員都覺得社會嚴重撕裂,炸彈仍未拆除,嚟緊希望馬上落區展開對話,每周會見不同人士,包括年輕人同抗爭者。有平台成員透露:「會將收集到嘅意見如實反映畀政府,盡快訂出和解方向,以及五大訴求政府可以如何做到。」
呢班「說客」到底有幾大牙力?做「架兩」會否吃力不討好?真係好考曾鈺成功力。身為民建聯創黨主席嘅阿曾一向係建制中嘅開明派,喺議會中面對如狼似虎嘅泛民亦非採取敵對策略。今次佢領軍中間派,有機殺出一條新血路嗎?

前監警會委員鄭承隆早前曾多次進入理大與抗爭者對話。