為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 陸叔開CHAT 2019 年 11 月 29 日

陳永陸

生活是很個人化的態度,人稱「陸叔」的著名財經股評家、兼投資策略顧問,用輕鬆心態,與跨界別嘉賓及以時事專題,去打開財經及以外的話匣子。

四十年的朋友

我喺金融界工作超過四十六年,其中踏足證券業都三十幾年,同好多同業一齊經歷過幾個股市大起大落,雖然我已經離開證券行但工作仍然同行業息息相關,所以香港證券業協會慶祝四十周年,新任主席徐聯安(Gordon)邀請我參加晚宴,我第一時間應承。晚宴上見到好多舊同事和行內老友記,平時大家好難夾到時間食飯聚舊,但見到面一啲都唔生疏,而難得聚首一堂,壓軸節目係一眾會董和友好上台大唱《朋友》,氣氛熱烈,亦反映同行不一定如敵國。
當晚筵開三十幾席,請咗唔少重量級嘉賓,包括財經事務及庫務局局長劉怡翔、證監會主席雷添良和副行政總裁梁鳳儀、港交所聯席總裁及首席營運總監戴志堅、張華峰議員等。Gordon亦特別多謝三位在四十年前創立協會嘅元老,包括董偉、張天生和羅沙。

香港證券業協會主席徐聯安(左)。

 


提到當年創會,晚宴上播出短片,講返七十年代香港四間交易所獨立運作,會員和交易資訊並不互通,同一隻股份喺唔同交易所可以唔同價,所謂「同股不同價」。後來金銀會和香港會越會買賣,但要知道雙方價位,惟有搵「麗的呼聲」拍攝兩會黑板情況然後播放,可以話係最早期嘅「互聯互通」!
當時股市正值發展階段,資訊和會員唔互通,令市場未能完全順暢運作。一九七八年,十四位屬於唔同交易所嘅證券經紀共同促成協會誕生,希望加強同業和市場訊息交流,促進合作,有利業界進步,協會嘅四環會徽都係咁意思。協會七八年註冊成立,翌年舉行就職典禮,所以今年名義上係四十周年,實質歷史已經有四十一年。Gordon致辭時亦講笑,話比起三十歲嘅證監會和十九歲嘅港交所,協會算係長輩。
協會由最初十四人,發展到今日有一千二百會員,涵蓋香港七成中、外、港資行,喺各個業界協會之中規模最大。而為關注行業發展和維護同業權益,協會一直同證監會、港交所等監管機構保持聯繫,為政策進行會員諮詢並提供意見。好似當年政府草擬《證券及期貨條例》,協會喺白紙以至藍紙草案階段,一直有專責小組跟進,代表業界提供書面建議。證券行業近年挑戰重重,協會每季都進行會員問卷調查,向傳媒和監管機構公布行業意見和
實況。
Gordon今年從上屆主席張為國(Gary)手上接過主席一職,佢坦言有壓力,一則香港正面臨內憂外患,行業特別係小型證券行經營倍加困難,再者金融科技愈加發展,傳統經紀業務空間勢必再被壓縮。呢個形勢下,證券業要設法擴大經營空間,例如在大灣區尋找機遇。相信Gordon可以分享佢公司亨達嘅經驗,唔係外資至做到國際化,佢哋作為港資公司可以喺十四個國家十八個城市營運,連中東、非洲、南美都有公司足跡,我都有興趣聽佢分享箇中經驗。而要迎接新經濟,運用金融科技,當然要依靠年輕人,所以Gordon另一倡議係促請政府資助業界開設實習職位,為行業注入新思維。