你二十歲的時候，正在做甚麼？
留意潮流趨勢？劈酒劈到通宵達旦？還是跟朋友問句：「Are you safe？」？
Play safe從來不能邁向成功之路，所以二十歲的姜濤，一早把目光放到舞台，立志揚名立萬。
「細個愈嚟愈肥，返學同學都笑我，加上讀書成績唔好，我初中就輟學，一事無成，當時好想搵到自己嘅專長。所以，當我決心要喺表演呢方面發展時，就為自己定下目標，然後減肥、練習⋯⋯呢家都係keep住努力做。」
求學求不到分數，他為自己另覓出路。一心成名的他，沒有隨波逐流當KOL博出名，充份發揮金牛座的固執，即使於一七年內地選秀節目《快樂男聲2017》鎩羽而歸，回歸本土再戰，終於贏得電視節目《全民造星》冠軍，成為「姐姐寵兒」，一嘗備受矚目滋味。
「攞咗冠軍，我就已經好大壓力，有時屋企人會問我：『點呀？有冇人勁過你呀？』，都係我嘅推動力。」
想爭勝，令姜濤好勝，畢竟還是二十歲，年輕就是本錢，是個好東西。

 

 

潛力股的遺憾

因為電視節目《全民造星》，令生於香港的姜濤，由素人搖身變成姐姐寵兒「姜B」；一年後節目推出第二季，令他重返比賽舞台。已屬演藝生力軍的他，訪問這天，身邊有髮型師、化妝師各兩位，加上其伯樂、節目監製花姐等，排場十足，卻未足以完全驅趕他的不安全感。
「由贏咗第一季比賽，到o依家要再次參加第二季，我每一日都有好大壓力，好多人會覺得，我贏咗冠軍（第一季）、攞咗嗰一百萬獎金，做得好係應該嘅，但係我只係一個普通人，會每一日都諗，點樣去令自己嘅存在獨特啲，o依家我仲好努力咁諗緊。」
姜濤的不安全感，源於他曾是二百磅的肥仔，喜歡唱歌和表演的他，對於自己的表演慾，他稱之是與生俱來。
「我好細個嘅時候，得一、兩歲，屋企人叫我打套拳，我真係成套打出嚟，仲拍埋video。但係後來大個啲、又肥咗，成個人都好內向、好自卑，小學、中學嘅時候都唔敢出聲，好多人叫我『死肥仔』，或者其他難聽嘅說話，對於一個肥仔嚟講，都係一個幾大嘅傷害。
「肥嘅時候，我喺學校仲試過爆褲鈕，粒鈕飛咗出去白板，俾人笑足半年！最慘係我嗰時鍾意嘅女仔都在場！個人唔開心，讀書成績又唔好，喺Form 2、3就退學，成個中學生涯，都識唔到一個朋友。」
被欺凌，又沒有同路人的扶持，姜濤連DSE也沒有報考。「學生生涯係我一個好大嘅遺憾，如果有中學肯收我，我都會重返校園嘅。」
身形令姜濤形成內斂的性格，於是他修讀了運動教練的課程，去學習知識和理論，令自己瘦得健康，於一年內由二百磅減至一百四十磅。「我嘅最大興趣就係食嘢，但係偏偏我嘅體質，係飲杯水都會肥，而且初時我係用斷食嘅方式去減肥，諗番其實好唔健康。
「o依家我會keep住做運動，尤其係跑步，呢個係最佳宣洩情緒嘅方法。有時我唔開心，去跑個步，聽住一啲好有正能量嘅演講，雖然我英文唔叻，但係聽到『You can do it!』、『Just do it!』，我就會開心番啲。」

初中的姜濤，仍是一名二百磅的肥仔，常被「死肥仔」三個字打擊自信心與自尊心。

這位姜濤嘴角含春地拖着的女生，是他聲稱以為拖過手，就等於拍拖的幸運兒。他表示初吻老早奉獻給母親，展現出鐵壁防禦功力。