為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 陸叔開CHAT 2019 年 11 月 22 日

陳永陸

生活是很個人化的態度,人稱「陸叔」的著名財經股評家、兼投資策略顧問,用輕鬆心態,與跨界別嘉賓及以時事專題,去打開財經及以外的話匣子。

Talking points

有人認為分析股市或者投資工具應該純睇基本因素、圖表和經濟大勢等,但我日常接觸公眾投資者,經常聽佢哋分享投資經歷,甚至家中點滴,慢慢了解佢哋嘅投資決定,所以分析時加入佢哋嘅角度和投資目標。我平日除咗做節目,最能夠同投資者交流就係講talk後嘅答問環節,有時觀眾甚至會寫低晒現有組合,即場問我應該換馬、溝貨定繼續持有,而組合中股份都往往能夠代表當時興炒乜股。
講起嚟,我講talk都廿多年,超過一百場,唔止透過講座接觸好多投資者,其實從我講嘅主題、主辦機構、合作方等都可以見證香港金融業嘅轉變。好似二○○○年之前,我當然主力幫大福證券講,而當時合作方多數係基金公司,佢哋負責介紹產品,而我作為券商代表就講股市。

置業和移民都是城中熱話。

 


離開大福後講嘅場數更多範圍更廣,但我睇返咁多年嘅talking points同主辦者,大致都同金融業大趨勢相關。例如二○○○年之後我主講嘅第一場大型講座係同瑞士尊貴理財合作,之後陸續好多同財富管理有關嘅講座,可見當時非常盛行。○三年港交所撤銷最低佣金制,銀行加入競爭,令證券行大受打擊,亦令行業進入低佣或零佣年代,呢種業態一直延續到今日。當時就有銀行搵我講股。
其中歷來我講過最大型嘅talk就係同恒生銀行合作,搵埋當時係科大工商管理學院院長嘅陳家強教授拍檔,分三個季度每季一場。第一場全場爆滿,千六位恒生客戶參加,但好多客反映報名時已額滿,於是第二季再辦時搵咗個大啲嘅場,三千二位一樣坐滿。到第三季時本來訂返同一個場,但報名好踴躍,結果立刻轉去平日用嚟開小型演唱會嘅場,最後有六千九位觀眾出席,真係有啲同山頂朋友傾偈嘅感覺。對我嚟講,幾千人嘅talk係好好嘅經驗,相信呢個亦係香港財經研討會觀眾人數一項紀錄。雖然做咗「紀錄保持者」,但我個人認為最理想嘅觀眾人數係二百至四、五百,因為有氣氛之餘又能夠有溝通。
○三年SARS之後有一輪保本基金湧現,之後有窩輪熱潮,大家都應該記得歷代輪后李頌慈、林燕玲等,我都有拍過檔。除財經專家,我亦同其他界別人士crossover,包括明星、歌星、十八樓C座班老友等,發掘更多跨界話題。至於去到近期,我最常出席嘅係投資移民和置業相關講座,兩樣都同香港人息息相關。FinTech逐漸盛行,我都有合作過,未來我期望同更多金融科企合作,等我自己都有機會汲收新知識。
咁多場講座之中都有唔少有趣嘅安排,例如德意志證券試過搵當時奪得奧運銀牌嘅乒乓孖寶李靜和高禮澤做特別嘉賓。聽佢哋講訓練嘅艱辛過程、點樣嚴守紀律同運用戰術,真係成功非僥倖,對投資者亦有啟發。當然孖寶出現引嚟觀眾起哄,爭相合照仲自備兵乓球攞簽名,連工作人員都要求合照,可見兩子魅力非凡。而講到得意亦有同里昂合作講風水指數,佢哋團隊着晒長衫馬褂主講,好有過年氣氛,亦順利成為財經talking point。