藍水成分未明 醫學會去信警務處

警方早前多次使用水炮車噴射俗稱「顏色水」嘅藍色染料，話係對人無害嘅食用染料，但有部分示威者中招後感到皮膚刺痛、紅腫，擔心成分唔知係乜東東，醫學會部分醫生都表關注。會長何仲平話近日收到有會員反映，希望了解「顏色水」嘅成分，以便提出準確治療指引，日前已去信警務處，要求提供成分說明。
何醫生無意左右警方施放「顏色水」既決定，「現時醫生一般建議用大量清水沖洗便可以，不過始終要知道成分係乜，先知道用水沖洗以外，需唔需要配合其他方法治療。」坊間雖然講到中咗「顏色水」會有刺痛感覺，懷疑混入胡椒水，何仲平就話，暫時未收到有市民因為中咗「顏色水」感不適嘅救助個案，相信殺傷力唔係想像中咁大。

 

何仲平收到有醫學會醫生關注「顏色水」嘅成分，已去信警務處了解。