為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2019 年 11 月 15 日

還擊泛民拉布抗爭 陳健波三招拆彈

陳健波當選新一屆財委會主席後,繼續做「大辣椒」。雖然兩個多星期嘅財委會已通過一百六十億元,但「波哥」覺得仍然太慢。為還擊泛民拉布,度出三招拆彈。
第一招係加會,日前陳健波提出喺十一月廿九日至二月二十八日期間加會合共廿四粒鐘,泛民議員冷淡回應。不過「波哥」話唔緊要,如照人頭計,建制派議員出席都夠人數,「泛民唔來,個會開得仲快。」但佢相信泛民唔會咁「順灘」,一定在會上問東問西。
為防泛民議員浪費時間,陳健波度出第二招,就係提醒官員要長話短說。佢話,以往財經事務及庫務局官員來到財會,泛民一定趁機質問連串問題,雖然答問有限時,但部分官員習慣一講就十幾分鐘。於是「波哥」近日約見該局官員,提醒佢哋以後來到財會答問題時要長話短說,將本來十分鐘嘅答案濃縮成一至兩分鐘,盡量短問短答,加快會議流程。佢斬釘截鐵話,必要時會手起刀落「剪布」,避免泛民拉布得逞。
出兩招都未夠,陳健波仲搵埋副主席陳振英主持會議。佢慨歎加會後,財會一開隨時八粒鐘,試過為加快開會,忍足三粒鐘唔敢去廁所。搏還搏,一人之力始終有限,所以「波哥」搵埋陳振英落水,叫佢幫手分擔部分會議。
政圈盛傳陳振英有望接棒做下屆財會主席,陳健波就話會將畢生主持議會嘅功力傳授,此話聽落有玄機,唔通「波哥」想部署引退?還是更上一層樓做立會主席?再三追問,佢話未係時候,唔講太多嘞。
幾年前佢曾經因為擔心做財會主席會激到血壓高,預先通定波仔,幸好近月畀人點激都無事。不過「波哥」慨歎好多時乜都幫政府擋,但部分官員解說及準備功夫不足,令佢擋得好累。近日忍唔住發信去財經事務及庫務局,向局長劉怡翔發炮,提醒局方注意部分撥款建議要避免諮詢不足、議程亂咁排嘅問題,希望佢哋正視!

陳健波(右)加會廿四小時對抗泛民拉布:「多項工程撥款關乎民生,泛民真係好自私,點可以連市民想用勞力賺錢維持生計都唔畀?」

 

泛民拉布令負責審議政府撥款嘅財委會成為重災區。

 

被視為下屆財會主席嘅陳振英(中)已答應協助主持財會,分擔陳健波沉重嘅工作。