台上一分鐘，台下十年功。
王梓軒將於十二月舉行入行十周年演唱會《Crossing源樂》。「『Crossing』有跨越另一個階段嘅意思；亦都可以解作呢個演出，cross咗一啲藝術、表演，同埋一啲人生嘅睇法；甚至乎當中會同唔同嘅人crossover。」
對三十三歲的他來說，十周年並非只是一個里程碑。「我覺得某程度上，更係另一個新嘅開始。我身邊合作開嘅趙增熹、Eric Kwok（郭偉亮），佢哋嘅第十年，都好似啱啱開竅咁，佢哋最好嘅作品，都係入行廿年後先出現。」
回望過去十年的時光，他由創作歌手開始，機緣巧合下當上節目主持、演出電視和電影，兜兜轉轉，他坦言曾在個人的演藝身份上迷惘過；直至四年前，劉松仁找他演出舞台劇《利瑪竇》，才讓他恍然大悟。
「個劇今年四月首演，下年一月會重演。呢個演出對我嚟講係個轉捩點！因為喺排練過程中，我終於明白，個天逼我行呢啲咁複雜、崎嶇同迂迴嘅路，就係想我成為咁樣嘅藝人——如果我冇咁多年嘅音樂鍛煉，就冇可能演到音樂劇；如果我冇咁多年嘅戲劇鍛煉呢？呢個劇裏面啲文戲，我又冇可能演到，因為真係好深、好難演。
「我唔應該諗，我係嗰樣或者嗰樣；我應該諗：我成為咗呢樣完全體，然後仲需要學啲乜嘢。」
所以，他這個演唱會，將會是他這十年經歷集合之大成。

 

十周年演唱會名為《Crossing源樂》。「源樂個『樂』字，可以係音樂嘅『樂』，又可以係快樂嘅『樂』，我想大家搵到快樂嘅根源。」

迷惘

王梓軒十年前出道時，心態十分純粹。「我係個創作歌手，其他嘢我唔搞，甚至乎宣傳我都懶理，淨係做音樂。表演？OK！但如果唔關事嘅，都唔好搞我！」
入行第二年，他便獲日本Avex賞識，簽約為旗下歌手。「我當時直情搬咗去日本住，諗住有個新發展。點知冇耐就311福島大地震，shut down晒所有娛樂事業。而我身邊嘅同事，亦都一個一個咁走咗，得番我一個，企咗喺度。」回流香港，他從頭開始，有幸在一二年舉行了首次個唱。「但開完，就樽頸位：如果我要再reach到更多人，我嗰個玩法係比較難。」
碰巧那段日子，他剛開始參與主持《兄弟幫》。「初初只係嘉賓主持，後來先正式。跟住因為咁，我又得到啲拍劇嘅機會，再然後，又因為拍劇，得到一啲拍電影嘅機會……嗰段時間，我係享受學習、接受挑戰之餘，亦都好困擾：咁我啲音樂點搞呢？但同時間，拍嘢幕前工作，又好似一直呼喚緊我：『試吓啦！觀眾反應都幾好呀！』」

為了應付演唱會，他幾乎每天都操練體格體能。「我會擺我操練嘅相同片上網試水溫，如果大家要我着得少嘅，服裝咪cut budget囉，哈哈。」

四年前獲劉松仁邀請演出舞台劇《利瑪竇》，讓王梓軒終於明白自己的藝人身份。