為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2019 年 10 月 30 日

最多五人爭一席 區選泛民50區互片

今屆區議會選舉活動已經展開,一千○九十名合資格候選人亦開始四出拉票。今次各政黨組織都傾巢而出,全港十八區合共四百五十二個選區,首次出現無「白區」,即係唔會有人可以自動當選。當中有八個選區出現五人爭一個席位,競爭最為激烈;四人混戰嘅亦有二十四個選區。由於泛民、傘兵同示威者為咗搶攻建制派嘅議席,進行大堆頭報名參選,搞到最少五十個選區出現兩個或以上嘅自己友同場互片。
其中馬鞍山市中心選區情況最嚴峻,工黨吳惠靈、前學民思潮成員鍾禮謙、泛民前議員助理邱文勁三人互片之餘,又要挑戰建制派嘅現任區議員李子榮,以及民主思路社區幹事李啟雄。揭示泛民協調參選機制失效,皆因兩個有意代表民主派出選嘅鍾禮謙同吳惠靈,曾於本月十三日喺區內進行初選,並由鍾禮謙勝出,吳理應讓路,但佢最終無喺提名期內退選;至於邱文勁更加因為喺一六年已落區做咗唔少工作,自然都想落場競爭。
另一爭崩頭選區就係尖沙咀西,同樣有三個泛民對戰,由脫離民協嘅前立法會議員馮檢基,跟年輕「尖碼之聲」陳嘉朗,以及一直以中文名「簡浩名」參加社運嘅巴基斯坦裔商人Phillip Khan角力。三人背景完全不同,同場跑馬仔嘅仲有民建聯代表潘景和,以及報稱獨立候選人梁幸輝。
現任立法會議員落區爭櫈仔同樣遇到同陣營人士追擊,好似民主黨林卓廷揀喺石湖墟出選,就要跟北區水貨客關注組發言人、綽號「金金大師」嘅梁金成硬撼之餘,亦要鬥贏埋新民黨代表孔永業才能取得議席。另外,出選八鄉南嘅朱凱迪,因擔心會被DQ,所以拉埋隊友徐卓然喺同一區參選作為PlanB,結果雙雙入閘,變相撞區,齊齊跟同區鄉事派參選人黎永添爭選票。

 

 

今屆區議會選舉在多事之秋下舉行,選管會上周進行的「候選人簡介會」,因泛民在場搞事,被迫中途腰斬。

 

林卓廷參加區選揀喺石湖墟出選,跟關注水貨客問題的「金金大師」梁金成撞區。

 

深水埗區地膽馮檢基出選尖沙咀西,遇上兩位泛民及兩位建制候選人,一共五人爭一席。