為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 陸叔開CHAT 2019 年 11 月 02 日

陳永陸

生活是很個人化的態度,人稱「陸叔」的著名財經股評家、兼投資策略顧問,用輕鬆心態,與跨界別嘉賓及以時事專題,去打開財經及以外的話匣子。

香港地有科技

香港人創業都好普遍,但「敢」於投入科技創新行業嘅並唔多,原因當然包括科研資金和人才,亦有評論認為政府扶助不足。如果淨係睇數據,二○一七年本港研發開支雖然按年增長百分之八,但佔GDP比率僅為百分之零點八。比較之下,世銀一七年資料顯示研發開支佔GDP比率最高係以色列,佔百分之四點五八,第二南韓佔百分之四點五五,美國佔百分之二點八排第九,中國佔百分之二點一三排第十五。香港排四十五位,的確係要急起直追。
雖然強敵在前,但香港近年都有唔少後生仔女加入科創行列。有香港ICT奧斯卡之稱嘅資訊及通訊科技獎由○六年開始,每年頒發八個界別獎項。我留意到一八及一九年得獎者倍靈科技和路邦科技,都由本地畢業生創立,百分百香港原創科技,而兩間公司理念都係希望通過科技令人類生活得更好。

香港年輕人的原創科技成果。

 


倍靈CEO梁立慧(Lydia)係科大「一條龍」(學士、碩士、博士)畢業生,再喺中大讀市場學理學碩士。呢間公司一六年正式開業,一共有十幾位工程師合力研究,並已成功推出醫療級睡眠質素檢測設備。睡眠質素欠佳好普遍,但好多人都唔察覺,以前要準確測量就要去醫院,貼滿儀器瞓一晚,公司研究將儀器簡化成一隻「倍靈指環」,戴住瞓就得,而且可以做到醫療級水平。記錄睡眠數據後,上載到雲端就可以進行分析,包括識別有冇睡眠窒息等問題。產品已經攞到美國食品藥物管理局(FDA)認證,可以話係站穩腳步。
另一間路邦就利用新一代5G通訊結合傳感機械人技術,研發咗全中國第一款5G機械人。兩位創辦人麥騫譽(Mark)和呂力君(Eden)都係中大碩士畢業生,所以佢哋將其中一項研發出嚟嘅機械人送咗畀母校作教學用途。路邦機械人最大特色,係利用傳感器令使用者可以感受到機械人所接觸嘅物件,並運用5G時延極低嘅特性,進行「冇時差」嘅人機協作。好似喺危險及惡劣環境之下,人可以喺範圍外睇住即時影像控制機械人,並透過傳感器感受現場情況從而作出反應或動作。
兩間科創都係政府扶持政策下嘅「示範單位」,佢哋分別加入科學園和數碼港嘅孵化器計劃,享受租金減免,另外政府亦有科研人才實習生補助,以及其他創業配套、種子資金及資助。目前兩個社區已經匯聚咗二千間公司,其中科學園孵化計劃下已「畢業」公司超過六百二十間,七成八仍然在營運,其中兩間成為獨角獸,截至三月已有四間喺香港上市。
政府扶助除資金、人才外,亦要think out of the box,或think out of the department。據Lydia分享,佢公司申請FDA認證時,如果用中小企身份去申請費用可減半,對於初創嚟講當然慳得就慳,但美國只承認稅局發出嘅證明,結果通過不同部門幫忙最終攞到證明。呢類政策和部門支援有助建立初創友善環境及生態圈,我好希望日後能夠見到香港培育出更多科企,喺金融、地產以外建立另一支柱產業。