為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2019 年 10 月 23 日

醫委會改選 「素人」「變色」名醫對戰

操醫生「生殺大權」,兼有權影響放寬海外醫生來港嘅醫務委員會正進行改選。港大深圳醫院院長盧寵茂拍住皮膚科專科醫生陳衍里,以同隊姿態參選,挑戰現任委員蔡堅同何柏良,即係四個人爭兩個席位。
名醫對陣拗手瓜唔係新聞,奇就奇在平日甚少沾手醫學組織選舉嘅盧寵茂同陳衍里,竟然撲出來以「素人」身份爭櫈仔。有醫學界口痕友話,盧、陳兩人雖然先後離開公家醫院,但喺醫界名氣仍然響噹噹,名副其實搵夠上岸,無必要拋個身出嚟撈政治濁水,當中以出身大富之家嘅陳衍里都插手醫界參選,惹來無限聯想。
近日陳醫生對外講,參選係有感醫委會過於保守,希望推動改革。此話一出,惹起部分私家醫生竊竊私語。事關陳衍里近幾年一直高呼要嚴格規管醫療儀器,認為激光等儀器應喺醫生監督下先做得,為此向政府嘈過唔少次,最後當局亦一度建議收緊管制,點知惹來美容界極大反對,唯有讓步,留番條生路畀美容界行。
名醫開到聲政府都當耳邊風,梗係激到班皮膚科醫生嬲爆,批評政府做事畏首畏尾,變相削弱醫生專業地位。今次陳衍里高調想入醫委會係咪想撥亂反正,還是另有議題想改革,認真耐人尋味。
講番蔡、何呢邊,就更加充滿話題性。兩人雖然各自標榜係獨立候選人,但因兩人喺反修例風波上,曾批評部分警務人員使用不恰當武力,業界都將兩人歸邊做「黃營」。不過,何柏良○八年參選立法會時,卻曾被指獲中聯辦「祝福」,一般認定佢係「淺藍」、建制派,現時突然被「變色」,有人推測係想箍業界「黃票」。
但何柏良嘅選情存在唔少隱憂,話說醫委會去年就一名七旬老翁喺九龍醫院,因用作呼吸嘅永久造口被紗布封實致死,裁定涉事醫生黃卓義兩項專業失當成立,判除牌半年,事件惹起醫生工會不滿,認為係護士做錯但由醫生「揹鑊」。單嘢何柏良正正有份裁決。

 

 

 

 

 

 

 

 

醫委會正進行改選投票,四名候選人(左起)陳衍里、盧寵茂、何柏良及蔡堅,將會爭兩個委員席位。

 

陳衍里與盧寵茂印製單張,拍住上拉票。