快將四十八歲的馬浚偉，自一二年離開無綫後，便成立了自家公司，既延續他的演員生涯，從電視劇跳到上舞台、電影；又因着自己的興趣開辦教育中心和咖啡工作室。
「我嚟緊仲會開電影公司，我啱啱先至reform咗我哋公司，????家有個新團隊、新形式去運作。我之後又會搞更多嘅project，同呢個社會有關，我想運用商業嘅價值，為呢個社會做番啲嘢。」
百足咁多爪，全因他的性格使然。「我好信奉multitasking，呢樣係我好鍾意嘅處事方法，我個腦嘅結構係咁，可以同時間專注好多唔同嘅嘢，所以大家見到，點解我涉獵嘅嘢會愈嚟愈多呢？我總係覺得，人生活喺地上，如果嗰樣嘢係會令你開心、你願意嘅，就盡量去做啦！
「當然，好多嘢我唔係為錢而做嘅——我唔係唔要錢，我都要賺錢o架；但係錢，係唔會迫使我做任何嘢，只要我足夠嘅時候，我就會去開拓一啲新嘅嘢出嚟。」
「新嘅嘢」應該包括本月底舉行的首次個人演唱會《Dream Big》。「好多觀眾都搞錯咗，以為我只係做電視，其實我當年係出咗三隻唱片，先正式拍電視劇o架！
「呢三、五年，大家睇到我做電視之後，轉戰咗舞台，跟住又轉戰埋電影；既然我連舞台同電影都做，我冇理由唔做音樂o架，始終，唱歌先係我最老本行喎。」
要是認真計起來，馬仔其實已唱了超過三十年歌。

 

十八區

馬仔早於中學時期，已開始經常參加歌唱比賽。「一路返學、放學、做part-time，一有時間就去參加歌唱比賽；就算我中五畢業出咗嚟社會做嘢，我都係不停參加。我嘅性格就係咁：唔怕輸，但係我鍾意贏！我參加歌唱比賽，唔覺得一定要攞到冠軍，反而慢慢係變成咗一種享受。」
那個八、九十年代的歌唱比賽，社區中心、酒廊、酒吧、卡拉OK都是戰場，而叫馬仔最熱忱參加的，則是較大型的《全港十八區業餘歌唱比賽》。「我由細到大都係住深水埗區，但係我區區都有參加，嗰陣你報名，冇人會查你，冇所謂o架，所以大家喺南區、西貢區、新界區，都會見到我，哈哈哈！」因着這個「十八區」歌唱比賽，更讓他成世人第一次上電視。「我唔記得係九一定九二年，喺亞洲電視播嘅，主持人係安德尊同盧希萊；我唱李國祥嘅〈摘星的晚上〉，代表港島南區，但我仲係住喺深水埗嘅，哈哈哈！不過最後我都係輸咗。」
至於當年另一個更大型的新秀歌唱比賽，他亦曾報過名。「不過我入唔到圍咋嘛，冇嘢o架，我面皮好厚，咪繼續參加囉！」

少年時代的馬仔，和他摯愛的母親合照。「我由中學開始，已經成日參加歌唱比賽，『十八區』嗰個，我區區都參加過，哈哈哈！」

本月底，馬仔將會舉行他入行廿六年來的首個個唱。「《Dream Big》係我公司嘅slogan，我想宣揚俾大家嘅理念，就係dream big and stay humble，夢想要夠大，做人要謙虛。」