為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2019 年 10 月 16 日

傘兵、示威者蜂擁參選 與泛民多區「攬炒」

十一月尾區議會選舉在即,喺反修例風波下,民主派同連登仔都食住個勢,咬住建制派唔放;更「冧友」狙擊多個「白區」,圖阻建制派自動當選區。不過「反白區」熱潮口號似乎易放難收, 多名素人摩拳擦掌落場應戰,仲未計唔少「鹹魚翻生」嘅政壇老將如馮檢基等亦屢敗屢選,火頭一時間多到民主派喺部分選區亦未能成功協調,出現撞區格局,派內人士亦擔心爭崩頭最終攬炒。
有份負責泛民協調機制嘅民主動力召集人趙家賢承認,今屆協調比上屆難十倍,主要係多區同時出現多名候選人,「當中有傘兵、示威者,亦有支持民主派理念嘅人,得我一把口逐個傾,真係傾到口水乾,惟有出動十八區有資歷嘅地區人士幫手協調,但至今仍有幾區未傾掂。」

民主派發起「反自動當選運動」力阻建制派自動當選,稱要奪取區議會控制權。

 


據了解傾唔掂數嘅,主要集中喺沙田同將軍澳。民主黨莊榮輝與「將軍澳民生關注組」李栢棠於西貢「都善」選區撞區,喺民主黨反對下未能加入民主動力。「沙田區政」則因成員謝潔冰同民主黨劉青喺帝怡撞區而被拒加入。
「將軍澳民生關注組」同「沙田區政」事後齊發聲明,批評民主動力以私怨分化同路人,促勿以大台自居;呢番話句句有骨,明眼人一睇就知火藥味好濃。
呢啲只係冰山一角,撞區情況仍然鬥到牙血都出埋,好似沙田鞍泰選區,來自「沙田區政」嘅湯子霈,同佔領運動期間被時任警司朱經緯棍打嘅鄭仲恒都有意出選,挑戰民建聯嘅招文亮,最後透過收集提名多寡決定人選,最終鄭獲勝。
係咪意味未選先內鬨?趙家賢就否認民主動力係大台,直言只係居中協調。佢話若然最終有組織加入唔到佢哋嘅認證機制,就算係同路人亦好難支持咁話。會唔會演變成「狗咬狗骨」而最終攬炒?趙家賢歎句:「呢個都係憂慮之一。」

屢敗屢選嘅前立法會議員馮檢基亦報名參選尖沙咀西,同獨立民主派陳嘉朗撞區。

 

民主動力召集人趙家賢(中)承認今屆協調工作較上屆難十倍。