為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2019 年 10 月 09 日

討論派救援隊上街 醫學會爆藍黃對陣

反修例風暴瀕失控,激進示威者爆發連場血腥衝突,上街當急救員的醫護人員亦多次捲入被捕風波,惹起醫學界高度關注。向來不作政治表態嘅醫學會,近日有醫生提議組織醫療隊去示威前線參與急救,結果引發一場「藍、黃」對陣,部分會董更拗到面紅面綠,火藥味濃。
據知,會內部分醫生眼見前線急救員以醫科學生為主,擔心佢哋經驗有限,提出以醫學會名義搞個救援隊上陣。建議除咗獲得「黃絲」醫生贊成,部分「淺藍」嘅會董都認為有得諗,但亦有部分「藍絲」以前線槍林彈雨隨時中招理由反對。

醫學會內藍、黃對陣,被指政見「偏藍」嘅會長何仲平(中)與「黃絲」前會長蔡堅(右)對是否派醫生去抗爭區急救各有睇法。

 


一場激辯後,大部分人對組隊落場有保留,提議改為舉辦應對前線急救嘅特別講座,教吓醫生點應對中催淚彈或其他槍彈嘅患者,等佢哋學完後自己決定點用。
會長何仲平於是請來有經驗嘅醫生講咗兩場talk,聽聞每次都有成八十人出席,但年輕醫生嘅反應就相當一般。消息人士話,部分年輕醫生覺得,醫學會同內地有來往,擔心一旦報名上堂,隨時會被視為抗爭者,擔心唔知會唔會將名單上報中央「篤灰」,最後嚟上堂嘅,都係一把年紀嘅醫生。
好哋哋搞堂talk變成政治分化,不少醫生都好無奈。何仲平就重申絕不會將上堂名單「篤灰」,「我知部分醫生有憂慮,所以講座最終採取不記名形式,等大家安心。」佢又否認會內對立嚴重,「每場講座都有十幾位醫科生來聽,可能前線醫生每日都喺醫院實戰緊,無需再上堂啩!」
外界傳佢因為政見「偏藍」,同「黃底」嘅前會長蔡堅拗到火紅火綠,何仲平聽完笑指係一場誤會,「我哋每個禮拜都傾偈,無不和。政見有時各有不同,但仍然係好朋友。」有醫生因不滿醫學會無出聲明譴責警方濫捕,高呼要光復醫學會,何醫生就反問:「光咩復?我哋都無淪陷過。」佢話,會內有不同聲音好正常,相信過咗一段時間大家回歸理性討論,就會無事。

前線急救員因跟示威者行得太埋,隨時被警方截查甚至拘捕。

 

不少醫護人員冒險上前線,向受傷示威者施救。