為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 陸叔開CHAT 2019 年 10 月 12 日

陳永陸

生活是很個人化的態度,人稱「陸叔」的著名財經股評家、兼投資策略顧問,用輕鬆心態,與跨界別嘉賓及以時事專題,去打開財經及以外的話匣子。

新世界以創意打社會房屋

之前提及過香港樓價全球最難負擔,對投資者嚟講當然可以喺海外尋找合適機會,但年輕人要在港上車實在大有難度。另一方面,公屋平均輪候時間今年亦上升至五點四年,睇返房委會最新資料,若計入房協可提供嘅出租及資助出售單位,預料未來五年公營房屋落成量只有約十萬伙,與長策每年公營房屋供應目標相比,仍欠五萬多伙。
在公私樓皆缺嘅情況下,現時香港已有近十萬個劏房單位,涉及近三十萬居住人口。除居住環境逼,劏房租金亦貴,有調查指房租已升至佔住戶收入四成。覓地難,公屋供應緊張,劏房戶上樓無期,問題始終難以解決,所以我好高興見到有心人出地出單位,為有需要住戶提供過渡居所。
新世界(0017)剛在九月底業績會上宣布捐出三百萬平方呎農地,同一般捐贈唔同,新世界計劃興建「創意社會房屋」,專攻基層年輕人。捐地舉動加入創意,我相信同集團執行副主席兼總經理鄭志剛(Adrian)有關,因為同公司The Artisanal Movement嘅品牌個性好脗合,回饋社會同時宣揚品牌訊息,對企業形象有正面影響。
公司捐地固然為紓緩基層市民居住問題,而今次特別希望幫助年輕人,因此Adrian破格提出創意社會房屋概念。公司打算喺三百萬呎之中撥一百萬呎,同「要有光」合作興建「光村」,新世界象徵式收一蚊費用,雙方上年已經簽訂合作備忘錄,今年落實捐地。

新世界一直有幫助年輕未置業港人上樓,承擔社會責任,包括之前推出過「新世代首置計劃」。

 


「光村」創意社會房屋希望利用創意為基層住客帶來家嘅感覺,而且會提供機會畀年輕建築師參與設計。項目會配備社區設施,如本土小店及文化創意場地,建立社群並凝聚家園意識,落成後會舉辦文化創意活動,發展成創意社區,為年輕人提供發揮創意嘅平台。
「光村」項目由Adrian一手促成,新嘅合作模式可以提高發展速度、效率及創意。「要有光」係社會房屋專家,早喺二○一○年已經開拓社會地產項目,新世界和「要有光」於一六年開始合作「深井光屋」項目。據Adrian解釋,再次選擇同「要有光」合作,係因為兩者理念相近, 希望利用新思維改善住屋問題,結合雙方長處為住戶提供一個家,並以創意元素推動基層向上流動。
一共三百萬呎農地可以興建好多房屋,但需要較長時間規劃,為盡快提供單位,新世界先推第一階段,揀咗天水圍港鐵站旁三幅共二萬八千呎農地,可以興建超過一百個三百呎單位,將優先提供畀有小朋友嘅基層家庭。農地有待通過審批以轉為住宅用地,但希望最快二二年建成。光村項目並非輪候制,而係通過社工轉介,租金根據租戶負擔能力而訂,同市價脫鈎,最多三年租住期。其餘二百萬呎農地就計劃捐畀其他非牟利機構或政府。
我見到新世界一直承擔社會責任,並且已經唔係第一次就居住問題出力,之前推出過「新世代首置計劃」,幫助年輕未置業港人上樓,作為集團舊人我都引以為傲。至於公司剛公布嘅業績,我下星期再同大家分析。