「盧海鵬試咪……」
訪問之時，攝影師要求「湯記」湯寶如試咪，她的自然反應，不是「testing one two three」，而是想也沒想，便說出了這句話。

陪伴她同來的張學潤Nel Nel聽見她這樣說，忍不住笑着挑她機：「講埋第二句（五個字的粗口）呀！」她即裝作一臉糊塗：「吓？第二句係乜嘢呀？我唔知喎！哈哈哈哈！」

或許因為她拍照時不愛笑，所以總是予人感覺很cool很正經，實情她是個很幽默的人，且愛反行其道，如最近推出四首新歌，她選擇不派台宣傳，反而選擇在麥花臣舉行演唱會《MINE MK》，現場演繹唱給觀眾聽。

 

「呢個Idea我諗出嚟嘅，我想大家聽完我唱，鍾意先去買。我覺得幾廿年嚟，推出歌曲嘅模式都係咁嘅樣：宣傳隻歌，吓吓都要上電台、電視台做訪問，咁不如試吓反傳統，乜嘢台都唔派歌，要聽嘅話，就嚟睇我個騷先啦。

「所以我呢個騷，正確嚟講，係音樂會，而唔係演唱會。嗰晚我頂籠都只會換三套衫，個台可能只係得一個大嘅video wall，唔會有煙花、唔會有大型嘅舞台設計，亦都唔會有好多dancers圍住我。我想呢個騷好簡單，純粹只係唱吓歌，同歌迷聚會一吓。」

奈何就在湯記十月四日四十八歲生日當天，她發表了音樂會暫時延後的聲明，要不然，她的兩位摯愛：男友陳德民（Sam）和兒子陳俊滔（Keaton），屆時應該也會來撐場吧！

「唔會！」她斬釘截鐵地說：「佢哋兩個除咗我一二年紅館開演唱會嗰次有嚟過，冇啦！跟住就冇啦！如果佢哋會嚟，真係要去拜神、祈禱呀！哈哈哈哈！」

十二歲

湯記說話很惹笑，尤其是談到她的兒子Keaton。「佢駁嘴駁到呢，真係張張拮肉，好似飛刀飛落嚟咁o架！」她隨即左搖右擺，邊「嘩嘩！」聲，扮閃避從上飛下來的刀。「真係估佢唔到o架！哈哈哈！」
至今她還很記得，之前主持《流行經典50年》，Keaton的反應。「佢嗰陣仲係讀小學，返嚟就向我投訴：『媽咪，你搞到我好煩呀！我啲同學係咁問，你係咪做《流行經50年》呀！』」那兒子又是否這節目的捧場客呢？「咁佢又真係冇睇o架喎——當然，可能我出咗去，佢有偷睇過我唔知啦！但係每次一到呢個節目開波嗰吓：『Hello大家好，歡迎收睇……』佢已經轉台！問佢：『做乜啫？我想睇番我做嘅嘢呀！』『你自己上番網睇啦！』咁o架喎！」說罷，她反反白眼。
現在的他，已經十二歲，就讀國際學校year eight。「佢已經有佢自己嘅同學同興趣，有自己嘅生活o架嘞。」會聽媽咪唱歌嗎？「唔聽！佢聽外國嘅音樂多啲，香港嘅，頂籠只係去到謝安琪嘅歌。o依家佢最叻係乜嘢呢？就係TVB《愛回家》嗰啲主題曲，佢真係識背o架，讀書又唔見佢咁叻喎！」

十二歲的Keaton進入少年期，湯記說，要教他性知識。「例如唔好咁早拍拖，唔好亂嚟，要坐監o架！哈哈哈！」

和兒子不時攬頭攬頸，關係親密。「比例上，佢八成唔嗲、兩成嗲。佢????家叫做大個咗，但係都需要父母監管吓嘅。」